NLW MS. 3035 (Mostyn 116) – page 105v
Brut y Brenhinoedd
105v
yd oedynt yn| aruer ac y| gochelynt ergytyeu y| brytanyeit
A| phan welas arthur hyny yd erchis ynteu trychu y
coet o| r parth hỽnỽ y| r ỻỽyn. A| chymryt y kyffẏon hynẏ
a| r traỽspreneu Ac eu gossot yn eu kylch. Ac eu gỽarch+
ae yno megys na| ch·effẏnt vynet odyno yny ym·ro+
dẏnt idaỽ neu yny vydynt veirỽ o newyn. A| gỽedy
daruot gỽneuthur y kae y dodes arthur y varcho+
gyon yn vydinoed yg kylch y| ỻỽyn Ac yno y| buant
veỻy tri dieu a| their nos. A phan welas y| saesson nat
oed dim bỽyt gantunt. rac eu marỽ oỻ o newyn ỽynt
a a·dologyssant y arthur eu goỻỽg yn ryd y| eu ỻogeu
y vynet y eu gỽlat Ac a gỽlat. ac adaỽ idaỽ ynteu
eu heur ac eu haryant ac eu hoỻ sỽỻt A| theyrnget
idaỽ pop blỽẏdẏn o germani. A| chadarnhau hynny
gan rodi gỽystlon. Ac arthur a gafas. yn| y gygor kym+
ryt hyny y gantunt. Ac eu goỻỽg y eu ỻogeu. Ac mal
yd oedynt yn rỽygaỽ moroed yn mynet tu a| e gỽlat
y bu ediuar gantunt gỽneuthur yr amot hỽnnỽ ac
arthur. A| throssi eu hỽyleu drachefyn parth ac ynys
.prydein. a| dyuot y draeth tỽtneis y| r tir A| dechreu anreithaỽ
y gỽladoed hyt yn hafren a ỻad y| tir·diwyỻodron a o+
rugant Ac odyna y kymerassant eu hynt hyt yg| kaer+
vadon Ac eisted ỽrth y gaer Ac ymlad a hi A gỽedy me+
negi hyny y arthur. Ryfedu a oruc meint eu tỽyỻ
ac eu hyskymundaỽt Ac yn| dianot crogi eu gỽystlon
ac ymadaỽ a oruc a| r yscotteit ac a| r fichteit yd oed
yn| y kywarsagu A bryssyaỽ a| oruc y| distryỽ y| saesson
Goualus oed am adaỽ hỽel ap emyr ỻydaỽ yn glaf
yg| kaer alclut o ỽrthrỽm heint. Ac o| r diwed gỽedy dy+
uot hyt y| ỻe| y gỽelei y| saesson Y| dywaỽt ef val hyn
| « p 105r | p 106r » |