NLW MS. Peniarth 15 – page 69

ef ohonaw drwy valchder Drwẏ ba fford y kavas ef y|broui Drwy seber+

wyt kanys dẏn a|vynnawd y vot ẏn|ẏ briawt vedẏant e|hvn a|dywedvt

val hvn yn amylder Ny|m kyffroir. i. vyth Paham y|gadawd dvw y broui

ef Ac yntev yn|gwybot y gorvydit arnaw am wybot meint a|wnaei o|da o|e

bechawt ef a dywat y sarff Na dywat Diawl hagen a|dẏwat wrth y|sarff

megẏs y|dẏweit heddiw drwẏ dẏn a|gaffo graff arnnaw Ac val y|dywat

yr angel drwẏ yr assen megẏs ẏ|gwẏpẏnt beth a|s·einnyei ẏ|geirev hynny drwẏ+

dvnt wy paham drwẏ y|sarff yn annyveil troedic llythric a|diawl a|wna

y|neb a|dwyllo ef yn droedic o|dwill Ac yn llithryc o|odineb A|vv wybot drwc

a|da ẏn|ẏr vn a·fal Ny|bv ẏn|ẏr aval namyn ẏn|ẏr agkyvreith kanẏs kynn pe+

chawt y|gwybv dẏn a|da a|drwc Da drwẏ y brovi Drwc drwy y|wybot

a|enit dẏnẏon drwc ym|paradwẏs na enit onnẏt yr etholedigyon e|hvnein

Paham yntev ẏ genir rei drwc yr awr·honn o|achos yr etholedigyon y|lavv+

ryaw Ac ẏ brovi drwẏdvnt wy Megẏs y provir yr evr ẏn|ẏ ffwrneis Pa|hyt

y|bvant wy ym|paradwẏs Seith awr Paham na bvant wẏ ẏno hwẏ no

hẏnnẏ kanẏs yn|y lle gwedẏ gwnevthvr gwreic y|troes hi ar gam Pa|ha+

wr y gwnaethpwẏt dẏn Ac yd|enwis yr holl annyveilleit* yn|y|chwechet awr

y|gwnnaethpwẏt gwreic Ac ẏn|ẏ lle ẏ|kẏmrth* hi yr aval gwahardedic Ac

y|ystynnawd anghev o|e gwr Ac yr anghev adaw y|bwyttawd Ac yn|ẏ Se+

ithvet awr yn diannot y|gyrawd yr arglwẏd wẏnt o|baradwẏs Pa|beth

vv chervbin a|r cledyf tan yn|ẏ law Y cledef yw mvr tan ẏsẏd ygkylch pa+

radwẏs o|r pan bechwẏt yndi hẏt heddiw E|chervbin yw egẏlẏawl geitwa+

daeth megys tan Pa|le ẏd aeth adaf yna y|ebron yd ymchwelawd y|r lle ẏ

gwnaethpwẏt Ac yno y|kreawd yntev veibon Ac yno y|lladawd kaym a+

bet Ac y|bv adaf yna heb achos idaw Ac Eva kan mlyved* ac y|ganet seith

yn lle avel abel Ac o|etived hwnnw y|ganet crist a|mi a|vanagaf ytti O

amse* adaf hyt ar noe na bv dafẏn glaw Ac na bv envẏs Ac na vwytta+

ei dẏnẏon gic Ac nat ẏvẏn win a|phob amser oed megẏs gwannwẏnn

Ac amylder o bop ryw da Ac gwedẏ hẏnnẏ y|symudwẏt pob peth o|achos

pechodev ẏ|dẏnẏon Pa|bachawt* a|wnaeth adaf pan yrrwẏt o|baradwẏs

chwenẏchv a|wnnaeth bot megẏs dvw Ac wrth hẏnnẏ yn erbẏn y|gorchẏ+

mẏn y|bwyttawd o|r pren gwahardedic Pa drwc vv vwytta aval kynn

vv hẏnnẏ o|bechawt Ac na allei yr holl vyt gwnevthvr yawn drostaw

kanẏs dẏn a|dẏlẏei vot yn vfẏd y|vẏd·dẏant dvw Ac o|e ewẏlẏs a|mwẏ

yw ewẏllẏs dvw no|r holl vẏt kanẏs pei savvt ti geir·bron dvw a|dẏ+

wedvt o|dẏn wrthyt y|difflannei ẏ|bẏt oll onnyt edrẏchvt dracheven

a|dywedvt o|dvw ẏna nẏ mynnhaf. i. edrẏch ohonat ti dracheven na+

mẏn edrych arnnaf|i nẏ dẏlẏut ti tremegv dvw yr hwn yssẏd lewenẏd