BL Additional MS. 19,709 – page 46v
Brut y Brenhinoedd
46v
vrtheyrn. ac e|hun hefyt a ym·rodes ym pob peth vrth
y gygor. kanys amgen dysc a|dyscassei yn|y clavstỽr
no ỻywyav brenhinyaeth. a gvedy kaffel o vrtheyrn
medyant kymeint a hvnnv yn|y lav medylyav a
oruc py ansavd y|gaỻei gaffel e|hun y vrenhinya+
eth. kanys hẏnnẏ yd oed yn|y damunaỽ ac yn|y ys ̷+
tyryaỽ o|e hoỻ dihewyt. Damwein truan heuyt a|r
daroed yr varv henafgỽẏr y|teyrnas a|e chyghor ̷+
wẏr yn ỻỽyr. megys nat oed vn gvr mor arbenig
a gvrtheyrn. a|megys meibon oed paỽb o|wyrda y
teyrnas oỻ y vrthaỽ ef. ac ef a gaffei enryded pa+
ỽb o·nadunt. kanys ef a vydei eu kygor. a gỽedy
gvelet o vrtheyrn y vot yn benaf ac yn kaffel pop
peth ỽrth y ewyỻys. Medylyaỽ a oruc o|e hoỻ ethry+
lithyr py wed y gaỻei diot constans vynach o|e ̷ ̷
vrenhinyaeth. a|e chymryt idaỽ e|hun. ac yna y kym ̷+
erth y|svỻt a|r tressỽr a|r kestyỻ a|r dinassoed kadarn
yn|y vedyant e|hun gan venegi y|r brenhin bot
dy·gyfor ỻuoed am eu pen o|r ynyssed. a gvedy kaf ̷+
fel ohonaỽ y gan y brenhin pop peth vrth y vynu.
gossot a wnaeth y anvylyt e|hun a|e diwydyon y
warchadỽ y ỻeoed. ac odyna medylyaỽ a oruc py
wed yd ystyryei vrat y brenhin. a|dywedut ỽrth
Constans val hẏn. arglỽyd heb ef reit yỽ itti a+
chwanegu dy deulu mal y bo dibryderach it ac
y bych ehofnach rac dy|elynyon. ac yna y duuna+
ỽd constans. ponyt y|th laỽ di heb ef y rodeis. i.
| « p 46r | p 47r » |