BL Harley MS. 958 – page 5r
Llyfr Blegywryd
5r
ẏ·gẏt ac ef kanẏs ef a ran ebranneu ẏ meirch
a|e lletyeu. Lletẏ ẏr hebogẏd ẏỽ ẏscubaỽr
ẏ brenhin kanys* heb·kẏr o|r mỽc. Lletẏ braỽ+
dỽr ỻẏs ẏỽ herwẏd rei ẏstaueỻ ẏ brenhin.
herwid ereiỻ ac ẏn weỻ ẏn neuad ẏ bren+
hin ẏ|dẏlẏ kyscu a|r gobennẏd ẏd eistedho
ẏ brenhin arnaỽ ẏ dẏd. a|uẏd dan ẏ ben ẏn+
teu ẏ nos. Gwas ẏstaueỻ a morỽẏn ẏsta+
uell a gaffant wely ẏn ẏr ystaueỻ. Lletẏ
dryssaỽr neuad a dryssaỽr ẏstaueỻ ẏỽ tẏ ẏ
porthaỽr. Penteulu a geif ancỽin ẏn|ẏ
lety teir seic. a|thri chorneit o lẏn. Teir punt
pob blỽẏdẏn a geif ẏn|ẏ gauarỽs ẏ gan ẏ bren+
hẏn. Pỽnt yỽ kẏfarỽs pob vn o|r teulu. O|r
keif teulu ẏ brenhin anreith. ẏ penteulu a
geif ran deu ỽr o|r bẏd ẏ·gẏt ac ỽẏnt. Ac o tra+
ẏan ẏ brenhin ẏr vn ỻỽdẏn a dewiso. Penteu+
lu a geif ẏ gan ẏ vrenhines o|r med ẏd heilo
y dẏstein erni. corneit ẏm pob kẏfedach. O|r
deila ẏ penteulu neb a wnel kam ẏ|ghẏnted
ẏ neuad. traẏan ẏ dirỽẏ neu ẏ gamlỽrỽ a
geif ef. Os is kẏntet heuẏt ẏ deilẏ ẏn gẏnt
no|r distein. ẏ traẏan heuẏt a geif. Ẏ eistedua
a uẏd ẏn|ẏ tal issaf ẏ|r neuad. a|r teulu gẏt
ac ef. Ar ỻaỽ asseu idaỽ at ẏ drỽs. Mab ẏ|r
brenhin neu nei idaỽ a dẏlẏ vot ẏn penteulu.
| « p 4v | p 5v » |