Oxford Jesus College MS. 119 (The Book of the Anchorite of Llanddewi Brefi) – page 103v
Buchedd Dewi
103v
a|Jeuengtit heb heneint. a|thagneued heb anuun+
deb. a gogonyant heb orỽagrỽyd. A cherdeu heb
vlinder. a|gobrỽyeu heb diỽed. Y|lle y|mae abel y+
gyt a|r merthyri. lle y|mae enoc ygyt a|rei byỽ.
lle y|mae noe ygyt ar llongỽyr. lle y|mae abraham
ygyt ar pedrieirch. lle y|mae melchisedech gyt a|r
offeireit. lle y|mae iob ygyt a|rei da eu diodef. lle
y|mae moysen ygyt ar tyỽyssogyonn. lle y|mae a+
aron gyt a|r escyb. lle y|mae dauid ygyt a|r|bren+
hined. lle y|mae ysaias gyt a|r proffỽydi. lle y|mae
meir gyt a|r gỽerydon. lle y|mae pedyr ygyt a|r
ebestyl. lle y|mae paỽl ygyt a|gỽyr groec. lle
y|mae thomas ygyt a gỽyr yr yndia. lle y|mae Jeu+
an ygyt a|gỽyr yr asia. lle y|mae matheu ygyt
a|gỽyr y judea. y|lle y|mae lucas ygyt a|gỽyr a+
chaia. lle y|mae marcus ygyt a|gỽyr alexandria.
lle y|mae andreas ygyt a|gỽyr sithya. lle y|mae
yr engylyon ar archengylyon. a|cherubin a|sera+
phin. A brenhin y|brenhined yn|yr oes ossoed. amen.
Ac val y|coffayssam ni deỽi yn|y uuched e|hun. A|e
weithredoed yn|y|dayar yma. Velle y|bo canhorthỽ+
yỽr yntev ac y|grymoccao y|eiraỽl y|nynheu geir
bronn y|gỽir greaỽdyr ar gaffel trugared racllaỽ.
Dyỽedic yỽ hyt hynn o|dalym o|uuched deỽi a|e wyrtheu.
Dyỽedadỽy yỽ rac llaỽ o|beth o|uuched veuno a|e ỽyrtheu.
| « p 103r | p 104r » |