Oxford Jesus College MS. 119 (The Book of the Anchorite of Llanddewi Brefi) – page 62v
Ystoria Lucidar
62v
O|degwch y|seint. Mỽy laỽer yỽ eu ragor hỽy
no hynny. Tegỽch absalon dybrydỽch vyddei
hynny yno. kannys eu tegỽch ỽy a uyd megys
eglurder yr heul. Megys y|dyỽedir. y|rei gỽiri+
on a|disgleirant megys heul. Ar heul yna a|uyd
tegach seith|ỽeith no|r aỽr honn. megys yd e+
deỽir vdunt. Duw med ef a|atneỽyda corff yn
vuudaỽt ni yn gyffelyb y|eglurder ef. Ac nat
amheuet neb vot yn tegach corff crist no|r heul
kannys tegach yỽ corff y|kreaỽdyr no|r kreadur.
a|dynyon a|dyỽedir eu bot yn temyl y|duỽ. Ac ny
dyỽedir bot yr heul velle. vrth hynny y|byd ky+
yrff y|seint ygorff eglurder crist yr hỽnn yssyd
loyỽach no|r heul. a|duỽ yn pressỽylaỽ yndunt
megys y|myỽn temloed. reit yỽ bot temloed
duỽ yn voe eu tegỽch. A|e gogonnyant no|r he+
ul. A llyna pa|ryỽ tegỽch yỽ vn seint. O vuander
y|seint. Buander assael. llesc ehỽyrdra yỽ hynny
yno kannys kynn vuanet vydant ỽy yna ac
y|tyỽynna paladyr yr heul o|r dỽyrein neu o|r gor+
lleỽin yr dỽyrein dracheuen. neu y gallo llygat
edrych yr aỽyr y|vynyd. kynn ebrỽydet a|hynny
y|dichaỽn y seint mynet o|r dayar hyt y|goruch+
elder nef. Ac o|r nef dracheuen hyt y|dayar. A
hynny a|dichaỽn yr engylyon y|wnneuthur
| « p 62r | p 63r » |