NLW MS. Llanstephan 27 (The Red Book of Talgarth) – page 180r
Gwyrtheu Mair
180r
y hoỻ gyfrinach dirgel. a|r honn a|dylyei kelu y gyfrinach
honno a|e menegis y|r archdiagon. ac ynteu y|r esgob. Ymo+
dỽrd a vu am diot yr abades neu dylyu y ỻosgi. pa beth
heuyt. dyd a|doeth yn oet y thymp. a|r dyd hỽnnỽ pan ytto+
ed y|manachesseu yn eu kabidỽl. nachaf yr esgob a|e athr+
aỽon. a|r chỽioryd a|guhudassant y pechaỽt ysgymun
hỽnnỽ yn eu plith. a|chythrudyaỽ a|oruc yr|abades rac
dolur ac ovyn a chewilyd. a|ffo a|oruc yn gewilydyus att
ueir waredockaf uam y drugared gan wediaỽ ac ỽylaỽ
dagreuoed rac bronn y haỻaỽr. a chludaỽ gouunedoed
hyt na|s|gỽnaei vyth. ac ny phaỻaỽd mam y drugared
idi hitheu. ar hynny rac diruaỽr dristyt a chythrud y
dygỽydaỽd kysgu ar yr abades. ac ar hynny nachaf y
wynuydedic veir yn|dyuot. ac engylyon yn|y gỽassan·ae+
thu. ac yn gyntaf yn angreifftaỽ y bechadures. A gỽedy
gỽarandaỽ y chyffes. ac adaỽ peidyaỽ trỽy ovunet y diuan+
naỽd yn rybuchedic. ac yn hynny o hun yd erchit y|r aba+
des. a|gỽir uv idi esgor ar uab. a|r mab hỽnnỽ a rodes y
wynuydedic wyry att yr engylyon ysprydaỽl y dỽyn a|r
eneit caredic idi. ac y ueithryn o hỽnnỽ yn amgeledus+
saf ac y gaỻei gan annerch o|e pharthret hitheu. A|thra
yttoedit yn hynny yd oed ymliỽ truan yn|y cabidỽl. ac yn
gewilydyus yd anuones yr esgob att yr abades o|e|dỽyn y|r
vraỽt. A gỽedy y dyuot yd anuones kennadeu y deimlaỽ
y chroth yn graff. a gỽedy na chafas y rei hynny nebryỽ
arỽyd beichogi arnei. gan ryuedu y|dugant y gennadỽri
honno. Eilweith yd anuones yr esgob ereiỻ o|r rei a|e kuhud+
assei
| « p 179v | p 180v » |