NLW MS. 3036 (Mostyn 117) – page 175
Brut y Brenhinoedd
175
or* a uei reit yn yr ymladeu hynny. A guedy y|dyuot
hyt rac bron vthyr. erchi a wnaethpỽyt idaỽ me+
negi beth a arỽydoccaei y|seren enryued honno.
Ac ar hynny sef a|wnaeth myr din ỽylaỽ
yn drut. Ac eissoes galỽ y yspryt attaỽ a dywe+
dut yr ymadraỽd hỽn. O gollet heb allu y ennill.
o wedỽ genedyl y brytanyeit o achaỽs marỽolaeth
emreis wledic an brenhin ni. Ac yn|y uarỽolyaeth
ef y daruydỽn ni oll. pei na rodei duỽ nerth in o
fford arall. Ac ỽrth hynny tywyssaỽc bonhedic
bryssya ditheu. Ac yn diannot ymlad a|th elyny+
on. kanys y|th laỽ y mae y uudugolyaeth. A thi
a uyd brenhin ar holl ynys prydein. kanys tidi
a arỽydoccaha y seren ar dreic tanaỽl y dan y se+
ren. Ar paladyr a|wely yn ymestynnu dros freinc.
a arỽydoccaha mab a|uyd ittitheu kyuoethaỽc.
Ar holl teyrnassoed a amdiffyn ac a uyd eidaỽ. Ar
paladyr arall a arỽydoccaha merch a uyd it. A me+
ibon honno a|e hỽyryon a uyd eidunt yr ynys
ol yn ol. Ac eissoes kyt bei petrus gan vthyr beth
ar dywedassei vyrdin a|e guir a|e kelwyd. Sef
a wnaeth kyrchu y elynyon megys y darparas+
sei. kanys ef ar dothoed yn gynesset y vynyỽ. Ac
nat oed y rydaỽ a hi namyn ymdeith hanher di+
warnaỽt. A guedy clybot o pascen a gillamỽri bot
vthyr yn dyuot parth ac attunt. sef a|wnaethant
ỽynteu dyuot yn erbyn vthyr ỽrth ymlad ac ef.
| « p 174 | p 176 » |