NLW MS. Peniarth 11 – page 35r
Ystoriau Saint Greal
35r
o achaỽs y ethol o duỽ. dy gar agos yỽ. a|th vraỽt dỽyweith.
vn o achaỽs y vot yn vn o gedymdeithyon y vort gronn. a|r
ỻaỻ am y vot yn gedymdeith ac yn bennaf o|r keis. Arglỽy+
des heb·y peredur ti a|dywedeist gymeint ac na|chwennych+
af|i vyth ymlad ac ef. ac yr duỽ dywet ym pa le y tebygy di
ymi gael ymdidan ac ef. kanys pei ym·gaffỽn ac ef vn we+
ith. nyt ymadawn vyth ac ef. Jaỽn a|wnant heb hi. dos dithe+
u ragot parth a|chasteỻ goch. ac yno y tebygaf|i y vot ef
neithywyr gyt a|e gevynderỽ. ac yno ti a|geffy chwedyl y ỽrth+
aỽ. ac ueỻy y bu beredur yn ymdidan a|e votryb yny vu a+
gos y hanner dyd. Ac yna yr anckres a|dywaỽt. arglỽyd
nei heb hi tric yma heno beỻach ygyt a|mi. kanys talym
yssyd yr pan vuam ygyt. arglwydes heb ef ny chaffaf|i heb
lesteir arnaf drigiaỽ. ac hynny heb ef gan dy gennyat ti
mi a|af ragof. Dim o|r gennyat heb hi nys|keffy di. Gan
hynny heb ynteu minheu a|drigyaf. ac yna diosc y arueu
a|oruc. a|dyrchafel byrdeu a|wnaethpwyt a|mynet y vwyta.
a|gỽedy bỽyt ef a|ymdidanaỽd yr anckres ac ef ac a erchis i+
daỽ gynnal y gorff yn gyn|lanet o|bop pechaỽt godineb o hyn+
ny aỻan ac yr oed yna. kanys o|r kỽympy di heb hi yn|y pe+
chaỽt hỽnnỽ neur baỻaỽd arnat gael gỽelet seint greal.
megys laỽnslot yr hỽnn a ymdigrifhaaỽd yn|y pechaỽt
hỽnnỽ. Duỽ a rodo gras ym heb y peredur y ymoglyt
racdaỽ. Yn|hyt y|dyd hỽnnỽ y trigyaỽd peredur yno. a gỽedy
daruot udunt ymdidan am yr hynn a|dywetpỽyt uchot. peredur
a|ovynnaỽd o|e vodryb pa antur a|e dugassei hi yno. a|phaham
| « p 34v | p 35v » |