NLW MS. Peniarth 190 – page 167
Ymborth yr Enaid
167
Y * ỻyuyr hỽnn yỽ y trydyd ỻyuyr
o|r llyuyr a|elwir kyssegrlan vuch+
ed. ac a|elwir ymborth yr eneit. ac yndaỽ
y mae teir|rann gỽahanredaỽl. Y rann
gyntaf a|draetha am y|gỽydyeu gochela+
dỽy a|r kampeu arueradỽy. Yr eil|rann
a|draetha am dwywaỽl garyat drỽy yr
hỽnn y kyssyỻtir duỽ a|dyn. Y dryded
rann a|draetha am berlewycuaeu a|del+
ont o|r karyat hỽnnỽ. ac am weledigaeth+
eu a rodo yr yspryt glan yn|y perlewycua+
eu. ac am nawrad yr engylyon. ac o hynny
kyntaf y treythir am|y gỽydyeu ual y gaỻ+
er eu|gochel ar vyrder. kanys anteilỽng
yỽ gỽydyus y gaffel dwywawl garyat. A|r
kampus a|e keiff megys y manegir rac|ỻaỽ
S Eith brifwyt yssyd y rei a|elwir
pechodeu marỽolyon kanys angeu
a|barant y|r eneit. ac am hynny y gelwir
ỽynt yn varỽolyon. Sef yỽ angeu y|r e+
neit gỽahanu duỽ y ỽrthaỽ yr hỽnn yssyd
The text Ymborth yr Enaid starts on line 1.
| « p 166 | p 168 » |