NLW MS. Peniarth 190 – page 240
Penityas
240
pa rei. nyt amgen. kymeruedwyr. neu
genhadeu. kanys paỽb o|r rei hynny
a ynt gyfrannaỽc ar y pechaỽt ac ar
y gyfyrgoỻ. ac ynteu yssyd gamgylus
a rỽymedic dros eu pechodeu ỽyntỽy.
Elchỽyl drỽy ba rei Sef yỽ hynny.
y·gyt a pha rei. neu yn erbyn pa rei.
Pa saỽl gỽeith. ef a|dyly y pechadur
kyffessu os gỽybyd. a|r offeiryat a|dy+
ly govyn nyt y pechodeu e|hunein.
namyn y gỽeitheu a|e heilweitheu.
yny dywetto ef pa saỽl gỽeith y bu
achaỽs idaỽ a gỽreic ryd neu rỽyme+
dic y araỻ. ac a vo idaỽ ac vn neu
a ỻawer. Pa saỽl gỽeith y dywaỽt ef
geiryeu trahaus o|e gymodaỽc. a phy
saỽl gỽeith yd eilweithaỽd y sarhaedeu
a chyffelyb y hynny. Kanys mal y
dyweit seint awstin. Gỽeli a eilweither
hỽyrach yd iachaa. Pa achaỽs. nyt
amgen. o ba brofedigaeth y gỽnaeth.
| « p 239 | p 241 » |