NLW MS. Peniarth 32 (Y Llyfr Teg) – page 131
Llyfr Iorwerth
131
a ennynnaỽd idaỽ. ac o hynny aỻan; bit yn dan
gỽyỻt. ac ny diwygir hỽnnỽ. Nyt a galanas
yn ol tan. Pỽy bynnac a losco godeitheu. o·nyt
y|maỽrth; ef a|e tal. Gỽedesseu a|gymeront we+
eu attunt neu betheu ereiỻ; o|r koỻir ỽynt a|e
talant. kanys eu cadỽ a|dylyant rac pob coỻ+
et. Nit oes gyflauan a|wnel tan ar gnaỽt dyn
a diwycker heb weithret dyn y·gyt ac ef. O deruyd.
dyuot moch y ty; a gỽascaru y tan yny losco
y ty a|diangk y moch; talet perchennaỽc y|moch
y ty. O|r ỻysc y moch ynteu; kehyded a vyd y·ryg+
thunt. kanys deu veredic ynt. Ac ỽrth hynny
yn|y ỻe y bo kyhyded kyfreith. ny diwygir. namyn eu
bot erbyn yn erbyn. Na dyget neb tan heb
ganhat. ac os dỽc; talet gamlỽrỽ kynny wnel
dim ac ef. Na rodet neb dan heb wybot beth
a wneler ac ef. ac os ryd; talet y draeanwerth.
O deruyd y dyn mynet y grassu y odyn dyn araỻ.
hyt ym·penn teir nos a thri dieu y goruyd ar+
naỽ vot drosti. O deruyd. y dyn yn dỽyn tan o ty e+
hedec tan y ganthaỽ; talet y weithret. ony eiỻ
bỽrỽ rann ar y tan o·honaỽ. Ny byd eneituadeu
neb yr treis. Sef achaỽs yỽ; sarhaet yỽ y|r neb
a dreisser. a herwyd y vreint. diwycker idaỽ y
sarhaet a|e da. a|e dirỽy y|r arglỽyd.
K yuebrỽyd cassec; pedeir keinhaỽc hyt ym
| « p 130 | p 132 » |