NLW MS. Peniarth 32 (Y Llyfr Teg) – page 163
Llyfr Iorwerth
163
Wyth pynuarch brenhin. Mor. a|diffeith ac aghe+
naỽc gwlat araỻ. a ỻeidyr. a marỽ o anuab. a
marỽ y kaffo ebediỽ. kamgylus y kaffo y
dirỽy a|e gamgỽl. Pỽy bynnac a dywetto yn
anwar yn erbyn y brenhin. talet gamlỽrỽ deu+
dyblyc idaỽ. Py le bynnac yd ymgaffo yr offei+
ryat teulu a|r distein. a|r braỽtỽr ỻys. yno y
byd breint y ỻys.
N Y dyly brenhin. mynet y eluyd gorwlat
o·nyt vnweith pob vlỽydyn. ỽynt a dy+
lyant vynet yn|y gyuoeth e|hun pan vyn+
no y brenhin. Ef a dyly o bop mileindref. dyn
a march a bỽyaỻ y|r ỻuydeu y wneuthur
ỻuesteu idaỽ. ac ỽynteu a|dylyant bot ar
y gost ef. Naỽ tei a|dyly bileineit y brenhin
y wneuthur idaỽ. Neuad. ystaueỻ. bỽytty.
stabyl. kynordy. yscubaỽr. odyn. trefyn ve+
chan. Kyrner neu hunty. Pob da heb per+
chennaỽc arnaỽ yssyd diffeith brenhin. Tri
pheth ny dyly y brenhin y gyfrannu a neb
os o anreith o wlat araỻ y keffir; eur. ac
aryant. a|chyrn bual. a gỽisc y bo urlys
ỽrthi. Camlỽrỽ deu·dyblyc a vyd yn ỻys
a ỻan. a dirỽ veỻy. Pỽy bynnac a|wnel cam
yn|y vam·eglỽys; talet pedeir|punt ar|dec.
a|r hanner y|r abat o|r byd dỽywaỽl lythyrwr.
| « p 162 | p 164 » |