NLW MS. Peniarth 32 (Y Llyfr Teg) – page 173
Llyfr Iorwerth
173
gyscu genthi. o darffei dỽyn treis arnei. Rei a
dyweit na dyly cowyỻ. ereiỻ a dyweit y dyly. kyfreith.
eissoes a|dyweit pỽy|bynnac a dorro morỽyndaỽt;
dylyu o·honaỽ talu y chowyỻ. Pỽy bynnac a
ueichocco gỽreic o lỽyn a pherth; ny dyweit kyfreith.
dylyu o·honei hi vagu yr etiued; namyn mis
y can·ueu. Sef achaỽs yỽ canny chafas hi
grym y gỽr; ny wyl kyfreith. dylyu o·honei hitheu
bot yn goỻedic o|e achaỽs ef. Py dyn bynnac
y bo haỽl arnaỽ. a|gomed y dadleu o·honaỽ
heb dyuot y atteb am yr haỽl. ympob dadleu
o|r y bo gomededic; camlỽrỽ a gyỻ. O deruyd y
dyuot ynteu y|r dadleu a|e adaỽ o·honaỽ yn
agkyfreithaỽl. a|galỽ o|r haỽlỽr am vraỽt. Sef
a wyl kyfreith. y peth yd oed yr haỽl arnaỽ y varnu
y|r haỽlỽr. a chamlỽrỽ ar yr amdiffynnỽr am
adaỽ y maes yn agkyfreithaỽl. ac yn oes yr arglỽyd
bieiffo y maes y dyd hỽnnỽ; na chaffo iaỽn
ymdanaỽ. O|deruyd idaỽ ynteu dyuot y|r maes
a|diodef haỽl. ac atteb. a barnu o kyfreith. idaỽ y
vot yn|goỻedic; ny cheiff atteb o·honei yn|dra+
gywydaỽl. O|deruyd. y|dyn rodi aryant neu ys+
grybyl att araỻ. ac o|r|da hỽnnỽ kyfnewidyaỽ
neu|elwha o|r neb yd aeth attaỽ. a cheissaỽ o|r
neb pioed y da rann o|r elỽ; kyfreith. a dyweit na|s
dyly onyt amot a|e|dỽc. kannyt a sỽỻt gan
| « p 172 | p 174 » |