NLW MS. Peniarth 32 (Y Llyfr Teg) – page 87
Llyfr Iorwerth
87
1
eu dat·anhudaỽ namyn o|r mab yn ỻe y dat.
2
kanny dylyir holi datanhud o ach ac edrif.
3
Pỽy|bynnac y barner datanhud idaỽ o ar
4
ac eredic; ef a|dyly eisted ar y tir yn diatteb
5
yny ymchoelo y gefyn ar y|das y kynhaeaf
6
rac·wyneb. ac yna atteb. a naỽuettyd o|r|kalan
7
gaeaf hỽnnỽ kyfreith. Y neb y barnher dat·anhud
8
idaỽ o vot ae karr ae kyuanhed. ac aelỽyt
9
idaỽ e|hun. neu o|e dat kyn noc ef ar y tir
10
hỽnnỽ. ef a|dyly bot yno yn diatteb hyt yn
11
naỽuettyd. ac yna rodi atteb. ac yn yr eil naỽ+
12
uettyd rodi kyfreith. Y neb y barnher datanhud
13
idaỽ o ry vot a|e vỽrn. ac a|e veich ac ef a|e dat
14
kyn·noc ef yn kyuanhedu aelỽyt ar y tir; ef
15
a|dyly bot yno yn diatteb teirnos a thridieu.
16
ac yna rodi atteb. ac ym·penn y naỽ·uettyd
17
kyfreith. a|r dat·anhudeu hynny ny dylyir eu
18
barnu y neb. o·ny byd rod ac estyn y gan ar+
19
glỽyd idaỽ gynt ar y tir. Pỽy bynhac ynteu
20
a vynho holi tir o ach ac etrif; dangosset
21
y|ach y|r kyff yd henyỽ o·honaỽ. ac ot yttiỽ
22
ef yno yn bedwyryd gỽr; priodaỽr yỽ. kanys
23
yn bedweryd gỽr yd a dyn yn briodaỽr. ac nyt
24
ueỻ y disgyn o briodolder yny vo amprio+
25
daỽr. kanys kyfreith. a dyweit. O|deruyd. y|dyn bot yg
26
gwlat araỻ. ae o achaỽs dehol ae o achaỽs
« p 86 | p 88 » |