NLW MS. Peniarth 46 – page 130
Brut y Brenhinoedd
130
uot idaỽ ef llad allectus. a llaỽer o|uilioed
ygyt ac ef. a|bot a|diaghassei ohonunt
y|gỽarchae yn llundein. ac erchi y|baỽp
dyuot attaỽ a|e holl allu gantaỽ y|geissaỽ
diỽreidaỽ gỽyr rufein. o|r ynys honn. ac y|r
ỽys honno y|doeth paỽb o|r a|hanoed o|gen ̷ ̷+
edyl y|bryttannyeit. a|gỽedy y|dyuot oll
hyt yno ymlad a|ỽnaethant a|r|gaer ac
a|r muroed yn|drut. ac yn galet trỽy am+
ryual peiranheu. a gỽedy gỽelet o|ỽyr
rufein. hynny. erchi a|ỽnaethant y|asclepi+
odotus y gellỽg ymdeith o|r ynys heb dim
da gantunt. namyn eu heneiteu cann da+
roed y|llad oll namyn un lleng oed etỽa
yn ymgynnal. ac yna yd ymrodassant ỽy
yn eỽyllys y|bryttannyeit. ac ual yd|oe+
dynt yn kymryt y kygor am eu|hellỽg
ymdeith. Sef a|ỽnaeth gỽyr gỽyned eu
kyrchu. ac ar yr frỽt a|gerdei trỽy lun+
dein llad gallus y|tyỽyssaỽc. a|e holl getym+
deithon. ac o|e enỽ ef yr hynny hyt hediỽ
| « p 129 | p 131 » |