Breudwd Welsh Prose 1300-1425
Cymraeg

Cambridge Trinity College MS. O.7.1 – page 56r

Llyfr Blegywryd

56r

llall. ny chyll y braỽdỽr onyt camlỽrỽ.
Ac ony oruyd y llall. camlỽrỽ a gyll.
Ny byd kylus neb braỽdỽr yr rodi a
datganu braỽt o aỽdurdaỽt yscriuen  ̷+
nedic kyny bo iaỽn. onys cadarnha
trỽy ỽystyl. namyn yr aỽdurdaỽt a
geblir. Or datganha braỽdỽr varn
heb lyfyr kyfreith yn|y llys. Ac nas
cadarnhao o ỽystyl yn erbyn gỽystyl
y llall; talet yr brenhin gamlỽrỽ. Ac
yspeit a geiff y rodi y varn o newyd
rỽg y dadleuwyr. ac y gadarnhau ae
honno ae arall. Or dyry braỽdỽr braỽt
ffalst rỽg y dadleuwyr a godef y vraỽt
o·honunt yn|y llys. A gỽedy hynny
rodi braỽt iaỽn ohonaỽ y|myỽn dadyl
gyffelyb. talet yr brenhin gamlỽrỽ
dros y vraỽt ffalst a rodes gynt. ca  ̷+
nys e|hunan megys tyst credadỽy
a dangosses trỽy vraỽt iaỽn ry rodi
o·honaỽ vraỽt gam kyn no hynny.
Or dyry braỽdỽr cam vraỽt yn er  ̷+
byn dyn ny allo trỽy gyfreith ym  ̷+
ỽystlaỽ ac ef am y gam uraỽt. namyn