Cardiff MS. 1.363 (Hafod 2) – page 106r
Brut y Brenhinoedd
106r
e gellynt gwrthvynebv vdvnt. Ac gwedy darvot
yr saysson escyumỽnedygyon gorffen er aerỽa
honno ny mynnassant wy llad Gortheyrn na+
myn y rwymaỽ. a|e vygythyaỽ. a chymryt y ga+
nthaỽ e kestyll ar dynassoed kadarn. Ac ena k+
anhyadv a wnaeth Gortheyrn vdvnt pob peth
o|r a vynnynt yr y ellwng ef en vyw y ymde+
yth. Ac gwedy kadarnhav pob peth o|r a|keyssy+
assant wy trwy arvoll ena ed ellynghassant ef o|e
karchar. ac en kyntaf e kymerassant wy kaer
lvndeyn. a chaer efraỽc. a chaer lyncoll. a chaer
wynt kan anreythyaỽ e gwladoed e fford e kerd+
ynt a llad e kywdaỽtwyr megys e lladey e bleydyev
deỽeyt gwedy ev hedewynt e bvgelyd wynt. Ac g+
wedy gwelet o ortheyrn e veynt pla honno ef a ae+
th hyt eng kymry kany wydynt pa peth a wnaey
en erbyn er escymvn kenedyl saysson honno.
AC ena galw a wnaeth attaỽ y henvryeyt a|e
dewynyon a goỽyn vdvnt pa peth a wnelhey.
Ac wynt a kyghorassant ydav adeylat twr kad+
arnhaf a ellyt y wneỽthỽr megys e bey hvnnỽ en
amdyffyn ydav kan ry kollassey entev y dynas+
soed a|e kestyll ereyll oll. Ac gwedy crwydraỽ
| « p 105v | p 106v » |