Oxford Jesus College MS. 119 (The Book of the Anchorite of Llanddewi Brefi) – page 120r
Credo Athanasius
120r
glan. Ac eissoes nyt ynt tri arglỽyd. namyn vn arglỽ+
yd. Sef yỽ hynny vn yỽ eu harglỽydiaeth hỽy. Ac
vrth hynny megys yn kymellir ni o gristonogaỽl
ỽironed y gyffessu ac y|adef ar neilltu vot y|tat yn
duỽ ac yn arglỽyd. Ar mab yn vn duỽ ac yn arglỽyd
ar yspryt glan yn vn duỽ ac yn arglỽyd. Velle y
gỽeherdir yni trỽy greuyd kyffredin gristonogaeth
dyỽedut vot y|tri duỽ neu tri arglỽyd. Y tat bellach
o defnyd nev o allu neb ny wnaethpỽyt. Ac ny chre+
ỽyt. Ac ny aanet. Y|mab hagen a|anet o|r tat e|hunan.
Ac ny wnaethpỽyt. Ac ny chreỽyt. yr yspryt glan
a|deuth ac adeilaỽd o|r tat ar mab. Ac eissoes ny
wnnaethpỽyt ef. Ac ny chreỽyt. Ac ny aanet. Ac
vrth hynny yn|y drindaỽt honn. nyt oes dim gynt
noe gilyd. Ac nyt oes voe na llei noe gilyd. namyn
yr holl teir person gogyfuoet ynt a|gogymeint. Ac
vrth hynny megys y|dyỽetpỽyt vchot ar|y|dechrev.
yr vn duỽ yn|y drindaỽt. Ar|drindaỽt yn|yr vn duỽ.
a|dylyir y enhrydedv. Ac vrth hynny pỽy|bynnac
a|vynnho yachav y|eneit a|e gorff yn|tragyỽydaỽl.
Reit yỽ idaỽ kredu val hynn yn|y drindaỽt. ~
A chyt a|hynny aghenreit yỽ y bop dyn. o|myn ka+
ffel yechyt. A|gỽaret tragyỽydaỽl o|e eneit. kre+
dv kymryt o iessu grist an harglỽyd ni. knaỽt ac
eneit dyn ymrv yr arglỽydes veir y|ỽir vam ef.
| « p 119v | p 120v » |