NLW MS. Llanstephan 27 (The Red Book of Talgarth) – page 5r

pha ryỽ eilun yỽ vn duỽ. Magister Delỽ a|gymerir yn ffuryfediga+

eth eilun o ryỽ a meint. a|e drych y|r dỽywolder yssyd yn|y drin+

daỽt. Y delỽ honno yssyd yn|yr eneit. a thrỽy honno y mae idaỽ

gỽybot a|vu ac a vyd. a|deaỻ y peth kyndrychaỽl. a|r hynn ny

weler. ac ewyỻys y dewissaỽ da. ac y ỽrthot y drỽc. ac yn vn

duỽ y maent yr hoỻ nerthoed. a chyffelybrỽyd y hynny yssyd

yn|yr eneit. Kanys craff vyd ar yr hoỻ nerthoed. ac megys nat  ̷

ymodiwed vn creadur a duỽ. ac ef yn ymodiwes a phob peth.

veỻy nyt oes vn creadur o|r a|weler a|aỻo ymodiwes ac eneit.

kanys ef a ymodiwed a phob creadur gỽeledic. kany dichaỽn

y|nef gỽrthỽynebu idaỽ. mal na medylyo petheu nefaỽl. na|r

eigyaỽn hyt na medylyo am uffern. a|ỻyna y substans yspry+

daỽl ef. discipulus A wnaeth duỽ dyn a|e dwylaỽ e|hun. Magister. O erchi e|hun

drỽy y eiryeu y gỽnaeth ef. ac o hynny y dangossir bot yn

vreuaỽl y anyan ef. discipulus Paham y gỽnaeth ef dyn o defnyd mor

dielỽ a|hỽnnỽ. discipulus Yr gỽaratwyd y gythreul ac yr kythrud idaỽ

bot peth pridlyt tomlyt ỻychaỽc megys hỽnnỽ yn medu y

gogonyant y dygỽydaỽd ef ohonaỽ. discipulus O ba beth y kafas ef y

enỽ. Magister Kanys ef oed y byt bychan. o bedeir rann y byt y kafas

ef y enỽ. y dangos y kyflaỽnei y genedyl ef y daear. a megys

y ragorei duỽ rac pob peth yn|y nef. veỻy y ragorei dyn rac

pob peth ar y daear. discipulus Paham y gỽnaeth duỽ yr aniueilyeit.

ac nat oed ar|dyn yna eu heissyeu. Magister Ef a|dywaỽt duỽ y pechei

dyn. ac y bydei reit idaỽ ỽrth bop peth o hynny. a|duỽ a|e gỽna+

eth oỻ. discipulus ae duỽ a wnaeth yr ednot a|r gỽydbet. a|r pryfet ere+

iỻ a|argywedant y dyn. Magister Kymeint vu graffter duỽ yn creu

yr ednot a|r chwein a|r bywyon ac yn creu yr engylyon. discipulus y ba beth.

Magister Yr molyant idaỽ e|hun y goruc duỽ bop peth. Y pryfet hagen