NLW MS. Llanstephan 27 (The Red Book of Talgarth) – page 90r
Mabinogi Iesu Grist
90r
gỽeỻ yỽ gennyf i vy marỽ no|m byỽ. ac yna y dywaỽt y gỽe+
rydon a oed y·gyt a hi. Nyni heb ỽynt a|wdam bot yn gyua
y gỽyrdaỽt hi. ac ymgadỽ o·honei yn anỻygredic. kanys
y duỽ y gỽedia hi. a|pheunyd yr ymdidan yr angel a|hi. ac y
dỽc idi y hymborth. a pha delỽ y dichaỽn hi bot. a neb·ryỽ
bechaỽt arnei. ac o|r mynny di dywedut o·honam yn tyb ni
ny|s gỽnaeth neb yn veichaỽc hi o·nyt yr angel. Joseph a|dyỽ+
aỽt yna. Beth heb ef a|dỽyỻỽch chỽi o·honaf|i. ual y crettỽyf|i
y beichogi hi o|r angel. ac wylaỽ a|oruc ef a|dywedut ual|hynn
Pa delỽ heb ef y beidyaf|i mynet y|r demyl. neu y ymwelet ac
offeiryat temyl duỽ. a pheth a wnaf|i. ac yna y medylyaỽd ef
ymgudyaỽ o·honaỽ ac adaỽ meir. A gỽedy ymlunyaethu o+
honaỽ ef kyuodi hyt nos o|e wely a|ffo. nachaf yr angel trỽy
y hun yn ymdangos idaỽ y|nos honno. ac yn dywedut ỽrthaỽ.
Joseph uab dauyd heb ef. nac aet vn ovyn arnat yr kymryt
meir yn briaỽt ytt. kanys yr hynn yssyd yn chroth hi o|r ys+
pryt glan y mae. a hi a esgora ar vab a elwir iessu grist. a
hỽnnỽ a|wna paỽb yn iach oc eu pechodeu. ac ar hynny
Joseph a gyuodes o|e hun. ac a dalaỽd diolỽch y duỽ. ac a dyỽ+
aỽt ỽrth veir. ac y|r gỽerydon a|oed y·gyt a|hi y weledigaeth
honno. a didanỽch maỽr a|gymerth yndaỽ am veir. Myui
heb ef a|becheis yn|diruaỽr o achaỽs y tyb a uu gennyf ỽrth
ueir. Odyna yd aeth y chwedyl att baỽp o vot meir yn ueich+
aỽc. Ac yna y doeth gỽassanaethwyr y demyl. ac y dalyas+
sant ueir a Joseph. ac y dugant hỽy att hyneif y demyl. a|r es+
gob yna a ymliwaỽd ac ef yn serth. Neut ỽyt tỽyỻedic heb ef
am y wyry honn. yr honn a uagaỽd yr angel yn|y demyl megys
| « p 89v | p 90v » |