NLW MS. 3035 (Mostyn 116) – page 114v
Brut y Brenhinoedd
114v
y| byrdeu. allan o·dieithyr y dinas yd aethant y chỽare
amryfaelon wharyeu. Ac yn| y ỻe marchogyon yn dan+
gos arỽydon megys kyt bydynt yn ymlad yn iaỽn
ar y| maes. A| r gỽraged y ar y| muroed a| r bylcheu yn e+
drych ar whare. Ereiỻ yn bỽrỽ mein. Ereiỻ yn saethu
Ereiỻ yn rydec. Ereiỻ yn gỽare gỽydbỽỻ. Ereiỻ yn
gỽare taplas Ac veỻy drỽy pop kyfryỽ amryfaelon
dychymygeu a gỽaryeu treulaỽ yr hyn a oed yn
ol o| r dyd gan diruaỽr lewenyd heb lit a heb gyffro.
a heb gynhen A| phỽy bynac a vei vudugaỽl yn| y gỽa+
re. Arthur drỽy amlaf rodyon a| e henrydedei. A| gỽe+
dy treulaỽ y tri dieu kyntaf y·veỻy. Y| petwyryd
dyd galỽ paỽb a wnaethpỽyt o| r a oedynt yg gỽas+
sanaeth. A| thalu y paỽb y| wassanaeth. a| e ỻafur her+
wyd y| dylyynt Ac yna y| rodet y| dinassoed a| r kestyỻ
a| r tir a| r dayar A| r escobaetheu a| r archescobaetheu
A| r manachlogoed a| r amryualyon vrdasseu megys
y| gỽedhei y paỽb ac y| dylei ~ ~
A c yna y gỽrthodes dyfric archescob y archescobaỽt
a| e teilygdaỽt. kanys gỽeỻ oed gantaỽ bot yn
didrifỽr a buchedu yn| y didriffỽr a buchedu ẏn| ẏ
didryf no| bot yn archescob Ac yn| y ỻe ynteu y gossot+
det dewi ewythyr y| brenhin yn archescob yg kaer
ỻion. buched hỽnỽ oed agrifft dayoni y baỽb o| r a| gym+
erassei y| dẏsc ynteu. Ac yn ỻe sampsỽn archescob
ỻydaỽ drỽẏ annoc hywel. ap emyr ỻydaỽ y gossodet
teilaỽ escob ỻan taff yr hỽn. A| glotuori y vuched
A| e deuodeu da a dangossynt y vot yn ỽrda Ac odyna
escobaỽt gaer vudei y veugant Ac esgobaỽt kaer
wẏnt y dỽywan. Ac escobaỽt lincol y| aldelmi.
| « p 114r | p 115r » |