NLW MS. 3035 (Mostyn 116) – page 173v
Brut y Tywysogion
173v
eglỽys gỽrthỽynebỽr y elynyon yn|y berffeith henneint
ac yn|y ol ynteu y bu escob nicol vab gỽrgant escob.
Yn|y vlỽydẏn hono y bu varỽ bernart esgob myniỽ. yn|y
dryded vlỽydẏn ar|dec ar hugein o|e escobaỽt. gỽr enryued
y volyanrỽẏd a dỽywaỽl y|santteidrỽẏd wedy diruaỽrẏon
lauryeu* ar vor a|thir ỽrth beri y eglỽys vyniỽ y hen rydit
ac yn|y ol ynteu y dynessaaỽ* yn escob dauid ap gerald
archdiagon keredigyaỽn. Yn|y vlỽydyn hono y bu varỽ
robert esgob henford gỽr a oed herwyd yn barnỽrnyaeth
ni grefydus a|chyflaỽn o weithredoed cardodeu a hegar
borthỽr y thodẏon* ac ar·benhic degỽch yr eglỽys yn gyf+
laỽn o dydyeu da hyt na lygrit cadeir y|r veint brelat
hỽnỽ o anheilỽg erlynyaỽdẏr yna yd|urdỽyt gilbert abat
kaer loyỽ yn esgob yn henford. Yn|y vlỽydyn hono y bu dir+
uaỽr varwolaeth yn|ynys prydein. Y vlỽydẏn racỽyneb
yd adeilaỽd ywein ap gruffud ap kynan casteỻ yn ial. Yn|y
vlỽydẏn hono yd adeilaỽd catwaladyr ap gruffud gasteỻ yn
ỻan rystut o gỽbyl. ac y rodes y ran ef o geredigyaỽn a cha+
dỽgaỽn y vab y|ghylch diwed y vlỽydyn hono yd adeilaỽd
Madaỽc ap Maredud gasteỻ croes hyswaỻt ac y rodes gyfei+
laỽc y owein a meuryc veibon gruffud ap meredud y
nyeint. Y vlỽydẏn rac ỽyneb yd atgyweirỽt cadeỻ ap gruffud
gasteỻ kaerr vyrdin yr tegỽch a|chedernit y deyrnas ac y
diffeithaỽd getweli. Yn|y vlỽydyn hono y carcharaỽd yỽein
vrenhin gỽyned. gynan y vab. Yn|y vlỽydẏn hono y delis
hỽel ap ywein catuan vab catwaladẏr y|gefynderỽ ac yd ach+
ubaỽd y|tir a|e gasteỻ. ny bu beỻ wedy hynẏ yny doeth Mei+
bon gruffud ap rys. cadeỻ a maredud a rys a ỻu gantunt
| « p 173r | p 174r » |