NLW MS. 3036 (Mostyn 117) – page 132
Brut y Brenhinoedd
132
ahaf y gallei o nifer rac ofyn geni teruysc eilweith
y·rygtunt a|r|brytanyeit. Ac yna pan gigleu hen+
gyst yr varỽ guertheuyr vendigeit. kynnullaỽ a
oruc ynteu trychant mil o varchogyon aruaỽc. A
chyweiraỽ llyghes. Ac ym·choelut traegefyn hyt
yn ynys prydein. A guedy gỽybot o|r brytanyeit
eu ry|dyuot niuer kymeint a|hỽnnỽ. Sef a gaỽssant
yn eu kyghor ymlad ac ỽynt kyn eu dyuot y|r tir.
A diffryt y porthuaeu racdunt. A guedy anuon o|e
verch attaỽ ef hynny. Sef a wnaeth ynteu ystryỽ+
aỽ bredychu y brytanyeit trỽy arỽyd tagneued.
Ac anuon ar y brenhin y venegi idaỽ nat yr keis+
saỽ trigyaỽ yn yr ynys y doethant y saỽl nifer
hỽnnỽ ygyt ac ef. namyn o tebygu bot guerthe+
uyr etwa yn uyỽ y dugassei hynny gantaỽ y|ỽ am+
diffyn racdaỽ. A|r niuer a uynho gỽrthe+
eyrn o·nadunt a talyet yn wyr idaỽ. Ac ar
ny mynho; ellyget y ymdeith yn diannot. A gue+
dy datganu hynny y|r brenhin. rodi tagneued a
wnaeth udunt. Ac erchi y|r kiỽtaỽtwyr ac y|r sa+
esson duỽ kalan mei a oed yn agos udunt; dyuot
ygyt hyt y|maes kymry y eu tagnouedu. Ac y wne+
uthur kymot y·rydunt. Ac aruer a oruc hengyst
yna o newyd geluydyt bradỽryaeth a thỽyll. Ac
erchi y pop vn o|e wyr ef Dỽyn kyllyll hiryon gan+
tunt y myỽn eu hossaneu gyt ac eu hesceired. Ac
yna pan vei dibryderaf gan y brytanyeit yn gỽne+
| « p 131 | p 133 » |