NLW MS. 3036 (Mostyn 117) – page 135
Brut y Brenhinoedd
135
ỽrth hynny. Ac yna y kyghoret idaỽ a·deilat kastell
cadarnhaf a allei. yn|y lle cadarnhaf a gaffei. megys
y bei hỽnnỽ yn amdiffyn idaỽ. can collassei y lleoed
cadarn oll o|e gyfoeth. A guedy crỽydraỽ o·honaỽ
llawer o leoed y|geissaỽ y ryỽ le a wenychei. o|r diwed
ef a doeth hyt y mynyd eryri. A guedy caffel ohon+
aỽ lle y bu adas gantaỽ wneuthur y gastell. kynnu+
llaỽ a|wnaethpỽyt holl seiri mein o|r a allỽyt eu ka+
ffel. Ac eu dỽyn yno. A guedy dechreu gossot y|grỽnt+
wal o·nadunt. kymeint ac a|wnelhit y|dyd o|r gue+
ith. trannoeth pan gyfottit neur daruydei yr day+
ar y lyncu heb ỽybot dim y ỽrthaỽ mỽy no chyn ny
ryffei eiroet uỽch y|dayar. A guedy menegi hynny
y ỽrtheyrn. gouyn a|wnaeth yỽ dewinyon. peth a
wnaei hynny. Ac yna yd erchis y|dewinyon idaỽ
keissaỽ mab heb tat idaỽ. A llad hỽnnỽ. A chymys+
cu guaet hỽnnỽ ar kalch. Ac iraỽ y mein heuyt
ar kalch ar guaet hỽnnỽ. A dineu y waet yn|y grỽnd+
wal hyt pan safhei y gueith velly. Ac yna yd anu+
onet y pop lle y|geissaỽ y kyfryỽ vab hỽnnỽ. A gue+
dy dyuot deu o|r kennadeu hyt y|dinas a elwit gue+
dy hynny kaer vyrdin. Nachaf y|guelynt bỽrn o
weisson ieueinc yn guare yn drỽs porth y|dinas.
A sef a|wnaeth y kennadeu dynessau y edrych ar y
guare. Ac eisted yn lludedic diffygyaỽl. Ac ymwar+
andaỽ am eu neges yr dothoedynt o|e cheissaỽ. Ac
wedy bot y|gueisson uelly yn guare yn hir. daruot
| « p 134 | p 136 » |