NLW MS. Peniarth 11 – page 10v

beỻach. Yr ymchoelut hỽnnỽ drachevyn heb y brenhin a|m

gorthrymha i yn vaỽr. Yna gỽalchmei a|dynnaỽd y helym

ac a|aeth dwylaỽ mynỽgyl a|r brenhin. Ac veỻy y gỽnaeth

paỽb o|r kedymdeithyon a hanhoedynt o|r keis. a|thrỽy ym·an+

nerch ac ef wylaỽ yn hidleit a|wnaei baỽp onadunt. ac ar

hynny ymwahanu a|orugant. Ac arthur a|doeth y gamalot

drachevyn. A|r keissyeit a gerdassant ar|hyt y fforest yny doeth+

ant hyt yng|kaste˄ỻ vagan. Y vagan hỽnnỽ gỽr da crefydus yt+

toed. ac vn o|r marchogyon vrdaỽl goreu o|r byt. A|phan we+

las ef y keissyeit gỽedy dyuot y myỽn. ef a|beris kaev y

pyrth. ac eu hattal yno y|nos honno megys oc eu hanuod.

ac a|dywaỽt kanys anuonassei duỽ idaỽ ef enryded kyme+

int ac eu dyuot ỽy attaỽ ef. nat eynt y ỽrthaỽ yn oet vn nos.

ac yna peri eu|diarchenu a|oruc. a|phan vu baraỽt pob|peth

y vỽyta yd aethant. a gỽassanaethu yn|diamdlaỽt arnad+

unt a|orucpỽyt. a ryued vu gan baỽp onadunt mor|didlaỽt oed

y kasteỻ o bop peth. a gỽedy daruot udunt vỽyta. ỽynt a

aethant yn eu kynghor pa beth a|wnelynt drannoeth. ac

yn eu kynghor y kaỽssant. ymwahanu o bop vn onadunt

y ỽrth y gilyd. a|thrannoeth y bore ỽynt a|aethant y|waran+

daỽ offeren. a gỽedy yr offeren ỽynt a|wisgassant eu harueu

ymdanadunt. ac a|aethyant ar eu meirch. ac a|gymeras+

sant gennyat y|gỽrda bioed y kasteỻ drỽy diolỽch y lewenyd

idaỽ. A gỽedy eu|dyuot y|r fforest. ỽynt a|ymwahanassant

pob vn y|ỽrth y gilyd onadunt. drỽy diruaỽr dristit ac ỽyl+

aỽ yn hidleit. o|r rei a|debygit e* |bot yn wraỽlaf onadunt.

yma y|mae