NLW MS. Peniarth 11 – page 202r
Ystoriau Saint Greal
202r
yn|y fforest yn gyndrỽc y gyweirdeb a|r teu ditheu doe. Arglỽyd
uab heb hi ys oed gỽeỻ gennyf|i yr hedỽch pei as|caffỽn. arglỽ+
ydes heb·y paredur ual hynn y mae yr|aỽrhonn. ef a|dylyit gỽ+
neuthur ryuel yn erbyn ryuel. a|hedỽch y|r neb a vei hedycha+
ỽl. Y marchogyon a|gymerwyt ac a|roet yng|karchar. Y chỽ ̷+
edleu a|doeth att arglỽyd y corsyd. y dywedut daruot y vab
y wreic wedỽ ỻad vn o|e varchogyon urdolyon. a|dwyn pe+
dwar yng|carchar. a ỻidiaỽc vu ganthaỽ ynteu yn|y ved+
ỽl a|e gaỻon hynny. a|thyngu a|oruc na orffowyssei vyth yn+
y gaffei daly paredur neu y lad. ac o|r bei yn|y helỽ marchaỽc
a|e dalyei idaỽ. ef a|ro dei idaỽ y casteỻ goreu ar y helỽ na+
myn vn. a phob vn yna a|ymbarattoes y geissyaỽ paredur.
a thrannoeth y bore ỽynt a doethant chỽech o|r marchogyon
hyt geyr bronn casteỻ camalot. a marchogaeth dan saethu
keirỽ yn|y fforest a|wnaethant. ac ymdangos a|orugant ual
y gỽelei y rei o|r casteỻ ỽynt. Paredur eissyoes a|oed yn gỽa+
randaỽ offeren yn|y capel. a phan|daruu offeren y chwaer a
dywaỽt ỽrthaỽ. arglỽyd heb hi weldyma y brethyn a dugum
i o|r ỻe periglus. kymer ef a chussana. kanys meudỽy a
dywaỽt ym na orvydit vyth ar yn gelyn ni yny geffit ef.
a|pharedur a|e kymerth ac a|e roes ỽrth y wyneb. a gỽedy hyn+
ny a|e roes yn|y vynnwes. ac a|wisgaỽd y arueu ymdanaỽ
ef a|r pedwar marchaỽc urdaỽl gyt ac ef. a|gỽedy hynny ef
a|doeth o|r casteỻ. megys ỻew pan oỻyngit o|e|gadwyn. ac a
dynessaassant att y chwech marchaỽc y rei a oedynt diga+
ỽn eu balchet. Paredur a|ovynnaỽd udunt pa|ryỽ wyr oedynt
a phỽy yr oedynt yn|y geissyaỽ. ac ỽynteu a|dywedassant mae
| « p 201v | p 202v » |