NLW MS. Peniarth 11 – page 256v
Ystoriau Saint Greal
256v
a|barỽn udunt ỽy dyuot yma. Arhoaf myn vyng|cret heb·y
laỽnslot os mynny ditheu eu gyrru ỽy yma. Gwir yỽ debyc+
af|i heb hi kanys diaỽl a roes ynot ormot o vilwryaeth. a
phany|bei hynny ny pharhaut ti dim yn erbyn vn onadunt
ỽy. a|phei|tebygassỽn i ym ffaelyaỽ yn|y mod hỽnn arnat ti
mi a|barassỽn y|m|tat dyuot yma y·gyt a|mi. a|e varchoc+
yon urdolyon gyt ac ef y|th lad pan yttoedut yn kysgu. A
vnbennes heb·y laỽnslot. dywet ti yr hynn a vynnych. ti a|w+
naethost debygaf|i ual|nat reit ym dy ovyn|di vyth. kanys
pỽy|bynnac a|gussano gỽr neu wreic. a gỽedy hynny a|vedy*+
aỽ y anghev idaỽ. y|mae hỽnnỽ yn traetur. Laỽnslot heb hi
mi a|gymereis yr hynn a|eỻeis y gaffael y ỽrthyt. ac nyt re+
it ymi diolwch ytti a|gefeis ~
L aỽnslot yna a|gymerth y ffrỽyn ac a|e|roes ym|penn y
march. ac a|gychwynnaỽd ymeith gyntaf ac y|gaỻa+
ỽd. kanys o|e vod ny mynnei y vot myỽn perigyl maỽr heb
ystyr. a hitheu a|doeth dra|e chevyn yn|drist ac yn doluryus. ac
y|ỽ hystaueỻ y kyrchaỽd hi yn|ỻidiaỽc am vot y neb mỽyaf
a|garei o|r hoỻ vyt yn peỻau y ỽrthi. am yr hun* ny thebygei
hi gael ỻewenyd vyth. Laỽnslot a|varchockaaỽd racdaỽ yny
doeth am hanner ryỽ diwarnaỽt y|r casteỻ periglus yn|y ỻe
yd oed meliot yn glaf. Yr vnbennes a|doeth yn|y erbyn ac a
dywaỽt. Laỽnslot heb hi grassaỽ duỽ ỽrthyt. Antur da a
rodo duỽ y|ttitheu heb·y laỽnslot pany bei dy drycket y|m kyve ̷+
ir.
| « p 256r | p 257r » |