Breudwd Welsh Prose 1300-1425
Cymraeg

NLW MS. Peniarth 18 – page 10r

Brut y Tywysogion

10r

A|llad a gaỽssant o|r anyueileit. a chymeint ac a|gaỽs+
sant a|ducssant gantunt. Ac a|ymhoelassant fford y
geredygyaỽn ỽrth lettyaỽ. a thrigyaỽ. a|mynet. a|dy+
uot hep edrych dim o achỽysson cadỽgaỽn. nac o|ỽa+
hard y brenhin. A rei o·nadunt dreilgỽeith a|oedynt
ynn cadỽ fford yd|oed hennafgỽyr o|r flemisseit yn dyfot
idi a|elỽit viliam o brebam. a|e gyfuerbynnyeit a|ỽn+
aethant a|e lad. Ac yna mynet o gadỽgaỽn gyt a
Joruerth y|lys y|brenhin. y|vynnu cael ynn hedycha+
ỽl ymdidan ac ef. Ac ual y|bydant yna nachaf ura+
ỽt y|gỽr a ledissit yn|y lle ynn menegi y|r brenhin ry
lad o|yỽein. A|e getymeithon y uraỽt. pann gigleu y
brenhin hynny. gouyn a|oruc y gadỽgaỽn beth a|ỽedy
di am hynny. ny ỽn arglỽyd. yna y|dyỽat y|brenhin.
kany elly di cadỽ dy gyuoeth rac ketymeithon dy uap
hyt na lladont vyggỽyr i eilỽeith mi a|rodaf dy gy+
uoeth y|r neb a|e catỽho. titheu a|trigyy gyt a|mi ydan
yr amot hỽnn yma na sethrych ti dy priaỽt ỽlat. a
mi ath|portha di o|m hymborth. i. yny gymerỽyf
gyghor ymdanat. beth a|ỽnelỽyf a rodi a|oruc y|brenhin
pedeir ar|hugeint idaỽ peunyd y kyfueir y|treul.
Ac yno y|trigyaỽd hep dodi gefyneu arnaỽ. namyn
ynn ryd y|fford y|mynnhei eithyr y|ỽlat e|hun. A|gỽedy
clybot o yỽein yspeilaỽ y|tat o|e gyuoeth. kyrchu y Jỽ+
erdon a|oruc ef a madoc ap ridit. A gỽedy hynny a
anuon a|oruc y|brenhin at gilbert uap rickert yr