NLW MS. Peniarth 18 – page 31r
Brut y Tywysogion
31r
Ny bu bell wedy hynny yny gyssegrỽyt eg+
lỽys veir ymeiuot. Yn|y ulỽydyn honno y bu
varỽ terdelach vrenhin conach. Y vlỽydyn rac+
wyneb y|duc henri vab yr amherodres vren+
hin lloegyr wyr oed hỽnnỽ y henri uab gỽi+
lym bastard diruaỽr lu hyt ymaes·tir caerlleon
ar|veder darestỽg idaỽ holl ỽyned. Ac yno gossot
pebylleu a oruc. Ac yna ỽedy galỽ o|yỽein dyỽys+
saỽc gỽyned attaỽ y ueibon. a|e nerthoed a|e a+
llu. pebyllu a|oruc yn dinas bassin a diruaỽr lu
ygyt ac ef. Ac yno gossot oet brỽydyr ar bren+
hin a|ỽnaeth. a|pheri dyrchauel clodyeu ar ve+
der rodi cat ar|uaes yr|brenhin. A gỽedy clybot
o|r brenhin hynny rannv y lu a|oruc. ac anuon
Jeirll llaỽer oc anneiryf o varỽneit gyt a|ch+
adarnn luossogrỽyd ar hyt y|traeth tu ar|lle y+
d|oed yỽein. Ar brenhin e|hun yn diergrynedic
ac aruaỽc bydinoed parottaf y|ymlad gyt ac
ef a|gyrchassant drỽy y coet a|oed yrygtunt a|r
lle yd oed yỽein. a|e gyferbynneit a|oruc kynan
a dauid meibon y|yỽein yn|y coet ynyal a|rodi
brỽydyr hỽerỽdost yr brenhin. a gỽedy llad llaỽer
o|ỽyr y brenhin. breid y|dieghis yr maestir dra+
cheuen. A|phann gigleu yỽein uot y|brenhin
yn dyuot idaỽ o|r tu dracheuen. A gỽelet ohonaỽ
y|ieirll o|r tu arall yn dynessav a|diruaỽr lu gan*+
| « p 30v | p 31v » |