NLW MS. Peniarth 45 – page 224
Brut y Brenhinoedd
224
inc a byrgwin a holl ynyssed yr eigaỽn y rei
a oed teyrngedaỽl y ruueinaỽl amheraỽdraeth
tra yttoydynt yn racuedu arnadunt. Ac ỽrth
hynny ydym ninheu yn ryuedu o eithyr mod
hỽyrhet yd ỽyt yn ymchoelut ar dy synhỽyr
ac y|th adnabot tu hunan. Canys diruaỽr
gỽl yỽ gỽneuthur codyant y sened ruuein. Ar holl
uyt yn dylyu darestỽng idi. Ac ỽrth hynny can
barnỽys sened ruuein. bot yn iaỽn y|titheu wneu+
thur iaỽn o|r saỽl sarhaedeu hynny. minheu a
archaf y ti dyuot hyt yn ruuein. erbyn dyỽ aỽst
nessaf y wneuthur iaỽn o|r saỽl sarhaedeu hyn+
ny mal y barnho sened ruuein. arnat. Ac ony deuy
ti yno yn|y teruyn hỽnnỽ. Ednebyd ti y deu+
af ui y|th teruyneu di. A phy beth bynhac a
cribdeileist di o|th ynuydrỽyd. minheu a|e dy+
gaf dracheuyn yny bỽynt gymherued y cle+
dyueu yn rannu yr rom.
AC gỽedy darllein y llythyr rac bron arthur
ar brenhined ar gỽyrda oed gyt ac ef. my+
net a wnaethant odyno parth a thỽr y keỽri
ỽrth atteb am y gennadỽri ar dothoed atad+
unt. A thra yttoedynt yn esgynnu gradeu y
tỽr. y dywaỽt Cadỽr tywyssaỽc kernyỽ gan
chwerthin yr ymadraỽd hỽn. hyt hyn ar+
| « p 223 | p 225 » |