NLW MS. Peniarth 46 – page 113
Brut y Brenhinoedd
113
heraỽdyr a galỽ honno o|e enỽ ef caer
Gloeỽ. yn tragywydaỽl. ac yg keffinyd ky+
mry a lloegyr yd adeilỽyt y dinas hỽnnỽ.
ar glan hauren. ac y gelwit caer loeỽ yr
hynny hyt hediỽ. ac yn saesnec y gelwir Glo+
eỽcestyr. ac ereill a dyweit y mae o achaỽs
mab yr amheraỽdyr a anet yno a elwit
Gloeỽ gỽlat lydan. y gelwit y·uelly hi. ac
eissoes o|r achaỽs kyntaf a dywetpỽyt yd
adeilỽyt y gaer. AC yn yr amser yd oed we+
irid adarweinidaỽc yn guledychu yn
enys prydein. Y kymyrth yr arglỽyd yessu
grist diodeiueint ym pren croc yr prynu
cristonogyon o geithiwet uffern.
A|Guedy adeilat y dinas a hedychu yr enys.
ymchuelut a|wnaeth yr amheraỽdyr
parth a ruuein. a gorchymyn y weirid
llyỽodraeth yr enyssed yn|y gylch. y·gyt
ac ynys prydein.
AC yn yr amser hỽnnỽ y seilyỽys pedyr
ebostol eglỽys yn gyntaf yn yr antiochs.
ac odyna y doeth ruuein. ac yno y deliis
teilygdaỽt pabaỽl esgobaỽt. ac yd anuon+
es Marc ewangelystor hyt y·r|eifft. y
pregethu eueghyl yr arglỽyd yessu
| « p 112 | p 114 » |