NLW MS. Peniarth 9 – page 20v
Ystoria Carolo Magno: Rhamant Otfel
20v
gerdyssant drỽyr bont tu ar dinas y geissaỽ
a ymwanei a hỽynt. kyn eu dyuot drachef+
yn hagen. ny mynnei y goreu o·nadunt a di*+
genei y vot yno yr mỽdỽl o eur coeth ydaỽ y
hun. Ac yna yd oyd petwar brenhin o an+
ffydlaỽn genedyl y paganeit wedy dyuot
y chware milltir vaỽr y ỽrth y dunas* pob
vn yn aruaỽc val y deissyuei y hun. Ac onyt
kelwyd a dyweit yr ystorya y rei hyn oyd eu
henweu. Un o·nadunt balsamin brenhin
gỽlat niuiuent. Yr eil oyd curabel vrenhin.
gỽr ny|chynhelis nay ffyd nay aruoll eiroyt
ỽrth dyn. Y tridyd oyd ascanard gỽr a ladys+
sei mỽy no mil o dynyon a|y gledyf. Y pet+
weryd oyd Clarel nyt oyd odyno hyt y lle
y kychwyn yr heul gỽr ky decket ac ef. ac
ny chaỽsei eiroet dyn a gynhalyei idaỽ yn
ymwan nac a sauei idaỽ vn dyrnaỽt. na|s
byrei yn y lle yr llaỽr. neu na|s lladei. Ac yn
kerdet ar hyt y mays ac yn arwein y hem+
ys gyr y hafỽyneu. Ac yn tygu o|r bydynt
vyỽ yn gyhyt ac y|gellynt dỽyn eu llu hyt
ym perued y ffreinc. na bydei waranrỽyd
y charlys a|y|eneit yn eu herbyn. Ac o|r deu+
dec gogyuurd heuyt o gỽneynt. y hewyll+
is. Ac yna y dywaỽt Clarel ỽrthunt ar+
glỽydi heb ef y ryỽ vygỽth hỽn nyt en+
illỽn ni dim. A mi a giglef glotuori. Rolond
yn vaỽr. Ac nat oyd hyt y dwyrein was well
| « p 20r | p 21r » |