NLW MS. Peniarth 9 – page 37v
Ystoria Carolo Magno: Pererindod Siarlymaen
37v
Eur ac aryant a ychwanegỽys y racdywede+
digyon rodyon hyny. A phỽy bynhac
a uynho gỽybot meint hyny ef a ell* y hun
adnabot eu bot yn ehalayth yny uedylyo
ac yd edrycho maỽredicrỽyd eu rodyaỽdyr.
A gỽedy kymryt arỽyd y groc ar y hysgỽ+
ydeu y brenhin a|y wyrda a gymerssant eu
hynt parth a dayar garusalem. Ar vrenhi+
nes ynteu o gyffredin gyghor y gỽyrda a e+
dewit ymparis yn boynedic o vryt a dolur
a|thristit. A gỽedy eu kerdet odieithyr y di+
nas hỽynt a|gyrchysant gỽastatrỽyd ehal+
ayth ac amhyl. Ar maystir hỽnnỽ a gyuo+
des yn dỽst ac yn bỽdyr gan amylder y me+
irch ac eu kynỽryf yny oyd y dỽst yn kyuo+
di uỽch eu pen yn ỽybyr ac yn dywyllỽch y
gudyaỽ rỽgtunt ar awyr ac a pheledyr yr
heul. Ac yn aỽr hanner dyd ymgyffylybu y
gyflỽchỽr gan ogyuadaỽ y nos yn|y ol yn di+
annot. Amylder o riuedi y niuer hỽnnỽ a
adaỽn i val peth anneiryf. pan vei betwar
ugein mil o tywyssogyon. pỽy eithyr duỽ ho+
ll gyuoythaỽc. a allei riuedi y niuer ac eu
canlynei hỽynteu. Ac yna y kilyỽys y bren+
hin ychydic y ỽrth y wyrda a galỽ attaỽ bert+
ram Jarll a|dywedut ỽrthaỽ val hyn. Dig+
rif yỽ genhyf i. heb ef gỽelet amylder y niuer
bonhedic hỽn nyt mỽy o genedyl noc o weith+
redoyd. A pha deernas a allei y gallu ymgyffr*
| « p 37r | p 38r » |