Oxford Jesus College MS. 57 – page 29
Llyfr Blegywryd
29
uetdyd mei. nyt attebant y neb o|r a|e|holo onyt
un o|r sỽydogyon vyd. Yr hebogydyon a|r gỽastro+
dyon. a|r kynydyon. kylch a|gaffant ar vileiny+
eit y brenhin a hynny ar wahan. Yr hebogydy+
on vnweith tra|geissyont hebogeu a|ỻamysten+
not. kylch a|gaffant. Gobyr y verch yỽ punt.
Y chowyỻ yỽ teir punt. Y hegỽedi yỽ seith punt.
Ebediỽ penkynyd yỽ punt a|hanner.
G ỽas ystaueỻ. nyt oes le dilis idaỽ yn|y
neuad. kanys ef bieu kadỽ gỽely y
brenhin. a|gỽneuthur y negesseu rỽng y neu+
ad a|r ystaueỻ. Y dir a|geif yn ryd. a|e varch y
gan y brenhin. Rann gỽr a|geiff o aryant y
gỽestuaeu. Ef bieu gỽneuthur gỽely y bren+
hin. a|e dannu. vn vreint y verch a merch y
pengỽastraỽt. y ebediỽ vyd punt a|hanner. ef
a|geif gỽisgoed y brenhin pan beito ac ỽynt
a brethyn y wely. Manteỻ a|pheis a chrys. a|e
hossaneu. a|e esgidyeu. Morỽyn ystaueỻ bren+
hines a|geif y gỽisgoed hitheu dieithyr y rei
| « p 28 | p 30 » |