NLW MS. Llanstephan 27 (The Red Book of Talgarth) – page 70r
Buchedd Dewi
70r
dewi. Dauyd sant ymbaratoa y dyd kyntaf o vaỽrth ef
a|daỽ dy arglỽyd di iessu grist a naỽrad nef y·gyt ac ef
a|decuet y daear y|th erbyn di. ac a eilỽ y·gyt a|thi o|r rei
a vynnych di o ysgolheyc a|ỻeyc a|gỽirion. a phechadur
Jeuangk a hen. mab a merch. gỽr a|gỽreic. cressan* a
phuttein. Jdew a sarassin. a|hynny a|daỽ y·gyt a|thi. a|r
brodyr kymeint un pan glywsant hynny drỽy wylaỽ a
chỽynaỽ. ac udaỽ ac ucheneidyaỽ a|dyrchafassant eu
llef ac a|dywedassant. Arglỽyd dewi sant kanhorthỽya yn
tristit ni. Ac yna y dywaỽt dewi ỽrthunt ỽy gan eu di+
danu a|e ỻaỽenhau. vy|m·rodyr bydỽch wastat ac vn uedỽl.
A pha|beth bynnac a|welsaỽch ac a glywsaỽch y gennyf|i. ket+
ỽch ef a gorffennỽch beth mỽy. O|r|dyd hỽnnỽ hyt yr w+
yth·uet dyd nyt aeth dewi o|r eglỽys o bregethu a gỽediaỽ.
Y chwedyl eissyoes yn oet vn dyd a aeth drỽy yr hoỻ ynys
honn ac y iwerdon gan yr angel. Sef ual y|dywedei yr ang+
el. Gỽybydỽch chỽi mae yn|yr wythnos nessaf yssyd yn|dyfot
yd a dewi sant aỽch arglỽyd chỽi o|r byt hỽnn yma att yr
arglỽyd o|r nef. Yna y gỽelit kyfredec gan seint yr ynys
honn. a seint iwerdon o bop parth yn dyuot y ymwelet a
dewi sant. O bỽy yna a aỻei diodef wylouein y|seint. neu
ucheneidyeu y meudwyot neu yr offeiryeit a|r|disgyblon yn
dywedut. Pỽy a|n dysc ni. kỽyn y personyeit yn dywedut.
pỽy a|n kanhorthỽya ni. anobeith y brenhined yn dywedut
pỽy a|n hurda ni. pỽy a|vyd tat kyn|drugarocket a|dewi.
pỽy a|wedia drossom ni ar yn|harglỽyd. Kỽynuan y tlodyon
a|r cleifyon yn udaỽ. Y myneich a|r gỽerydon. a|r rei priaỽt.
| « p 69v | p 70v » |