NLW MS. Llanstephan 27 (The Red Book of Talgarth) – page 86r
Mabinogi Iesu Grist
86r
ueit. a|r rei a diwyỻynt duỽ yr rann o|m da. ac yno yd atteba+
ỽd y gỽas ieuangk idaỽ. angel y duỽ ỽyf|i heb ef. a mi a
ymdangosseis hediỽ y|th wreic di yn|y ỻe yr oed yn wylaỽ ac
yn gỽediaỽ. a mi a|e|dideneis hi. yr honn a|wybydy di y bot
yn ueichaỽc o·honat ti. a honno temyl y|duỽ yỽ. a|r yspryt
glan a|orffowys yndi. a hi a vyd gỽynuydedic ar yr hoỻ wra+
ged yn gymeint ac na|dywetto y chyffelyb kynno hi na gỽe+
dy. disgyn o|r mynyd att dy wreic. a thi a|e keffy hi a rat y+
n|y chroth. a|r|arglỽyd duỽ a|gyffroes hat yndi. ac a|e gỽnaeth
yn vam y|r dragywydaỽl vendith. a Joachim yna a|e gỽedi+
aỽd ac a|dywaỽt ỽrthaỽ. O chefeis i rat geyr dy vronn di
eisted y·chydic y|m temyl a bendicka dy was. Yr angel a|dyỽ+
aỽt yna ỽrthaỽ. na dywet ti dy was namyn dy gyt·was. ~
kanys y vn arglỽyd yr ym weisson ni. sef yỽ hỽnnỽ. duỽ.
kanys vy mỽyt i a|m|diỻat anweledic yỽ y|r dynyon. ac ỽrth
hynny nyt myui a|dylyy di y wediaỽ ar vynet y|th demyl
di. namyn yr hynn a rodut ti y myui gỽna aberth y duỽ
o·honaỽ. Ac yna y kymerth Joachim oen heb uam idaỽ
ac y dywaỽt ỽrth yr angel. Ny beidỽn i gỽneuthur aberth
y duỽ pei na bei dydi a|e harchei ym. ac a rodut gennyat
ym y aberthu. Pei na|bei y rodi ytt heb yr angel nyt an+
nogỽn ytt y aberthu. a phei nat adnabuassỽn ewyỻys
duỽ am·danat. ac efo yn|gỽneuthur yr aberth. gyt a|r
mỽc o|r aberth yr aeth yr angel y|r nef. Ac yna y gỽedia ̷+
ỽd Joachim yn dadolỽch o|r chwechet aỽr o|r dyd hyt bryt
gosper. A phan yttoed ef ueỻy. ỻyma veibyon a|chyfnewit+
wyr yn|dyuot attaỽ kany wydynt paham y dygỽydassei. ~
| « p 85v | p 86v » |