Cambridge Trinity College MS. O.7.1 – page 38v
Llyfr Blegywryd
38v
o pob parth yn tagnefedus heb
gyffroi haỽl ymdanaỽ yn llys heb
loski ty heb torri aradyr o eisseu
kyfreith. ny dyly y rei hynny ỽrtheb
y neb o·honaỽ gỽedy y teir oes hyn+
ny. kanys cayedic yỽ kyfreith y·rydant
Y neb a odefo rodi tref y tat y arall
yn|y ỽyd yn tagnefedus heb lud a
heb wahard heb erbyn dywedut.
kyt as gofynho gỽedy hynny; ny
werendewir yn|y oes o gyfreith. Y
etiuedyon hagen ae keiff os gof+
ynnant yn gyfreithaỽl. Ny chae
kyfreith rỽg brenhin ae tir dylyet
yn llei yspeit no chant mlyned.
Gỽedy y bo ran odefedic rỽg kyt
etiuedyon ar tir. nyt oes un iaỽn
y vn o·honunt ar ran y llall. ac eti+
ued idaỽ. eithyr o atran pan del y
amser. Pỽy bynhac ny bo idaỽ eti+
ued o gorff; y gyt etiuedyon nessaf
o uỽyn y teir ach or kyff a uydant
yn lle etiuedyon idaỽ. Ny dichaỽn
neb o gyfreith dilyssu tir yn erbyn
y etiuedyon
| « p 38r | p 39r » |