Cardiff MS. 1.362 (Hafod 1) – page 24v
Brut y Brenhinoedd
24v
A chỽedy kaffel damunedic wynt drychauel hỽyleu
a dyuot aber temys yr tir. Ac yna y doeth kyswal+
lavn a holl gedernyt ynys prydein gantaỽ yn eu
herbyn. a beli tywyssaỽc y ymladeu a|e benteulu
a|e deu nyeint auarỽy tywyssaỽc llundein. a thene+
uan tywyssav* kernyỽ. a chreidu vrenhin prydein
a gỽerthaed vrenhin gỽyned. a brithael vrenhin
dyuet. Ac y am hynny ieirll a barỽnyeit a mar+
chogyon vdolyon*. Sef y kaỽssant yn|y kygor. kyr+
chu ulkessar yn|y bebylleu kyn kaffel o·honaỽ dyuot
yr wlat. gan tebygu bot yn anhaỽs y wrthlad gỽedy
y kaffei a|e dinassoed a|e kestyll. A gỽedy llunyaethu
eu bedinoed a chyrchu gỽyr rufein yn|y pebylleu yn
diannot. Ac yna y bu kyn galettet y vrỽydyr hyny
oed y tyweyrch yn rydec o|waet. mal pei delhei dehe+
uwynt yn deissyuyt y todi eira a reỽ. ac ual yd oe+
dynt yn yr ymfust hỽnnỽ y kyuaruu y vydin yd
oed nynhyaỽ vab beli ac auarỽy vab llud yn|y lly+
wyaỽ a bydin ulkessar. a llinaru bydin yr amhera+
ỽdyr. Ac ar hynny yd ymgyuaruu nynyaỽ ac ulkes+
sar a diruaỽr lywenyd a gymyrth nynyaỽ yndaỽ
am damweinaỽ idaỽ gyuaruot a gỽr kyuurd a hỽn+
nỽ. Ac yn diannot y gyrchu a oruc. A phan welas ul+
kessar nynhyaỽ yn|y kyrchu a chledyf noeth troi
y taryan yn wychyr gyflym a oruc ac erbynyeit
y dyrnaỽt a oruc arnei. a megys y gadỽys y ner+
thoed idaỽ gossot a wnaeth ynteu a chledyf ar nyn+
nyaỽ ar uchaf y helym ar penfestyn yr eil yn gyf+
lym mal y bei agheuaỽl. A phan welas nynyaỽ
| « p 24r | p 25r » |