Cardiff MS. 3.242 (Hafod 16) – page 83
Meddyginiaethau
83
kymer vel ac emenyn. neu vel a bystyl gafyr a
chymysc ac ir ef a|r rei hynny. Llyma y ỻysseuoed ̷
y perthyn gỽneuthur dỽfyr ohonunt y olchi y kic
drỽc ac ef a phob peth o|r a hanffo o|e gyfryỽ. drỽy win
a saygh. pabi. clusteu r ỻygoden. y mordynat. gỽimon.
y tryỽ. yr hen·ỻydan. a|r|ỻonhidyd. Rac gỽaeỽ idỽu
a chỽydo; kymer. wreid y redyn. a mortera yn da; a|chy+
mysc a bychydic o|dỽfyr tỽym a|th dỽy·laỽ yn da. ac
odyna gỽasc trỽy liein a|gỽna blastyr ohonaỽ a
blaỽt heid. a thorr wynn·wy a|than ac ysglis a|dot ỽr+
thaỽ ar gadach. Rac pob kyfryỽ waeỽ; kymer dalym o
vlodeu y banadyl ac elestyr. a|r briaỻu. a|dyrneit a|de+
il y morgelyn a gỽreid y tauol cochyon. a mortora* yn
da. a gỽna eli o·honunt trỽy emenyn ac ir ac ef.
Rac gỽaeỽ myỽn glinyeu a thraet a breicheu.
a phob ryỽ gymal; kymer. y redeuis a|r rei ereiỻ uchot.
ac oleỽ o oliwyd. ac emenyn. a gỽer geifyr. a gỽer
deueit. cod. mel. halen. mer|hyd. a berỽ myỽn padeỻ
a hidyl drỽy liein ac aruer ohonaỽ. Eli frỽythlaỽn
rac pob ryỽ waeỽ oeruelaỽc; kymer; y saygh. a|r samin.
rut. ambrot. wermot. blodeu y banadyl. y tryỽ. gỽ+
reid y pumystyl. y greulys uaỽr a|r gruc. a mortera
ỽynt yn da. a dot y myỽn y·chydic o|win a thalym
o oleỽ o oliwyd. a dot myỽn ỻestyr y aeduedu seith ni ̷+
warnaỽt. ac odyna berỽ ygyt a|blonec ac emenyn
a gỽer gafyr. a gỽer dauat. a chỽyr. a gỽasc drỽy lie+
in. yn da. a|dot yndaỽ god. a rosing. a|chadỽ ef ac
| « p 82 | p 84 » |