Oxford Jesus College MS. 57 – page 177
Llyfr Blegywryd
177
chen y coet y telir. y neb a|e trycho a|e tal. a cham+
lỽrỽ y|r arglỽyd. Os gỽadu a|wna. reith gỽlat a|a
arnaỽ. a|r|gyfreith honno yssyd y bop dyn am y
goet Teir kynnefaỽt yssyd. kynnefaỽt a|erlit
kyfreith. kynhaladỽy yỽ. a chynnefaỽt a raculaena. kyfreith.
o|r byd aỽdurdaỽt brenhinyaeth idi. kynhaladỽy
yỽ. kynnefaỽt a lyckro kyfreith. ny dylyir y
chynnal. Tri|pheth a gadarnhaa kynnefaỽt.
aduỽynder. a gaỻu. ac aỽdurdaỽt Tri pheth
a|wna* kynnefaỽt. gorthrymder. ac angheugant
uonhed. a dryc·angreith. a hi a|wrthledir rac dryc+
angreith Beth bynnac nyt yscriuenner myỽn
kyfreith. ac a|aỻer trỽy dylyet y gyffelybu y|r
hynn a yscriuennwyt yn ossodedic. kynhaladỽy
vyd yn ỻe kyfreith yn|y dadleueu. kany eỻir ys+
criuennu pop peth o|r a|vo reit y dywedut. neu
y varnu. kyfreith heuyt a|dyweit o|r kyffelyby+
on. kyffelyb varn a|dylyir. Teir rann yỽ aỽdur+
daỽt howel da. a|e gyfreitheu. nyt amgen. kyfre+
ith y lys peunydyaỽl. a|chyfreith y wlat. ac aruer
kyfreithaỽl. o bop un ohonunt.
| « p 176 | p 178 » |