Oxford Jesus College MS. 57 – page 200
Llyfr Blegywryd
200
hynny yn|diwaỻ. a|gỽneuthur udunt mal y|r
rei eidunt e|hun. Y geilwat a|dyly caeu ar yr ychen
mal na bo ry gyuyng arnadunt. ac o|r deruyd
drỽc udunt yn hynny o uessur. ef bieu eu talu.
neu ynteu y lỽ. na|wnaeth udunt gỽaeth noc y|r
eidaỽ e|hun. Ny dyly yr amaeth na thalu* yr y+
chen na|e briỽaỽ. ac os briỽ ae vn ae oỻ talet neu
wadet. Yr amaeth a|dyly kymorth y geilwat o
daly yr ychen. ac ny dyly oỻỽng un o·honunt
namyn y deu vyrrewys. Gỽedy darffo y ky+
ueir paỽb a|dyly kyrchu y defnydyeu attaỽ at+
ref. karthỽr na march ỻyfyn ny henyỽ o|r kyfar.
Ny dyly neb dodi goresgỽr ar ych y gilyd onyt
amot neu o|e ewyỻys. O|r deruyd bot amrysson
am dryc·ar. edrycher erỽ yr amaeth a|e dyfnet
a|e|ỻet. a|e ar. ac ỽrth hynny gỽneler y baỽp
kystal a|e gilyd. O|r deruyd bot y·rỽng deu gyf+
arỽr amrysson am|dir gỽyd. ac araỻ ffaeth. a|r
neiỻ yn mynnu eredic tir gỽyd. a|r|ỻaỻ yn myn+
nu peidyaỽ a|e eredic. onyt amot a|e duc racdaỽ.
| « p 199 | p 201 » |