NLW MS. 3035 (Mostyn 116) – page 66r
Brut y Brenhinoedd
66r
noed. kynan hef* ef ỻyma vn o|r gỽladoed goreu yn
freinc gỽedy y|darestỽg imi. gobeith yỽ genyf weith+
on kaffel y|rei ereiỻ. Ac ỽrth hẏnnẏ bryssyỽn y gymryt
y|kestyỻ a|r kaeroed a|r dinassoed kyn mynet y|chwe+
dyl hỽn yn honeit dros y gỽladoed ac ym·gynuỻaỽ
paỽb ygyt yn an herbyn. kanys o|chaffỽn i y|teyrnas
hon nyt oes petrus genyf kaffel oỻ freinc yn einym.
Ac ỽrth hynẏ na vit ediuar genhyt kanhadu imi ̷
dy dylyet ar ynys prydein kyt bei gobeith it y|chafel
kanys by|beth bynac a|r goỻych di yno minheu a|e
heniỻaf yma itti. Ac yn gyntaf mi a|th|wnaf yn vren+
hin ar y|wlat hon. Ac a|e ỻanwn oc an kenedyl nu
hunein gỽedy darffo in bỽrỽ estraỽn genedyl oheni
yn ỻỽyr. Ac odyna hon a vyd eil vrytaen A|hyt y gỽe+
lir imi gỽlat frỽythlaỽn yỽ hon o ydeu ac afonyd
frỽythlaỽn o bysgaỽt a|choedyd tec a·das y|hely.
A|herwyd y gỽelir imi nyt oes wlat garueidach
no hon. Ac adaỽ a|wnaeth kynan yn kadỽ tragy+
wydaỽl fydlonder idaỽ ynteu gan vfydhau idaỽ
a diolỽch yr hyn a adaỽssei idaỽ.
A c yna eilweith kyweiraỽ a|wnaethant eu ỻu
yn vydinoed a mynet hyt yn rodỽm Ac yn
dianot gỽereskyn y|dinas. kanys gỽedy clybot
o|r freinc creulonder gỽyr rufein a|r brytanyeit.
Sef a|wnaethant adaỽ y gỽraged a|r meibon a ffo y|r
kestyỻ a|r keryd kadarn. Ereiỻ y|r coedyd a|r keryc
a|r mynyded diffeith y geissaỽ amdiffyn eu heneitheu
Ac nyt arbedei wyr rufein a|r brytanyeit nac y vaỽr
nac y vychan nac y hen nac y ieuanc namyn y|r
gỽraged e|huneint A|gỽedy vdunt gỽereskyn yr
| « p 65v | p 66v » |