NLW MS. Peniarth 32 (Y Llyfr Teg) – page 209
Llyfr Iorwerth
209
y dyn a|e delis hynny; ymchoelet y ỻedrat attaỽ.
Os ynteu a|e gỽatta; dygỽydet y gỽercheitwat
yg|kyfreith. ledrat. Os ef a dyweit ynteu y vot yn wiry+
on o|r ỻedrat; beth bynnac a dywetter arnaỽ. ac
na cheisso ardelỽ namyn o|e wirionhynni; iaỽn
yỽ gadu y ardelỽ idaỽ. yny baỻo. a barnu reith
arnaỽ. O|deruyd. gyrru ỻedrat ar dyn. a barnu reith
arnaỽ; a bot yn weỻ ganthaỽ eilweith dy·gymot
a|r arglỽyd no mynet dan y reith; ny dyly yr
arglỽyd dy·gymot ac ef. o·nyt gan gaffel o|r
coỻedic yr eidaỽ. kanny dyly yr arglỽyd idaỽ
dim namyn o|e vot yn euaỽc; a|e vot ynteu yn
euaỽc pan ỽrthotto y reith. ac ỽrth hynny y|dyly
y coỻedic y da. ac odyna y cosp yr arglỽyd; ac
yn dec idaỽ y gymryt. Rei a|dyweit na eỻir tor+
ri amot; kanys ual|gouunet yỽ amot. a phop
gouunet kyt torrer iaỽn yỽ dyuot idi drache+
fyn. a|e gadỽ o newyd. ac ual hynny am amot
gan dieissiwaỽ y neb y torrer ac ef. Kyfreith
a|dyweit. pỽy bynnac a ymỽrthotto a pheth
yn kyfreithaỽl yr meint y ymrỽyn ac ef nac amot
vo na|pheth araỻ; nat oes haỽl idaỽ ar hỽnnỽ
trachefyn. kan torres y rỽym. a bot yn ỽrthot
ar amot y dorri. Y dyn y torrer ac ef hagen;
a eiỻ y holi os mynn. kanny|s torres ac ny|s|gỽr+
thodes. ac ỽrth hynny y dyly ynteu y le a|e amot
drachefyn.
| « p 208 | p 210 » |