NLW MS. Peniarth 36A – page 34v
Llyfr Blegywryd
34v
y dylyet o pleit y| ryeni trỽy ach ac etryt.
Teir etiuedyaeth kyfreithaỽl yssyd ac a
trigyant yn dilis yr etiuedyon. vn yỽ
etiuedyaeth a gaffer o amot kyfreithaỽl
y gan y perchenhaỽc yr gỽerth. Eil yỽ
etiuedyaeth trỽy dylyet o pleit ryeni.
Tryded yỽ etiuedyaeth a gaffer trỽy
amot kyfreithaỽl o vod y perchenhaỽc
heb werth Or gỽneir eglỽys o ganhat
y brenhin y myỽn tayaỽc·tref. ac offei+
rat yn offerennu ae bot yn gorfflan hi.
ryd vyd y tref honno o hynny allan.
Y neb a holho tir eglỽyssic. nyt reit
idaỽ arhos naỽuetdyd ymdanaỽ. na+
myn vyd gỽir idaỽ pan y gofynho.
Or kymer tayaỽc brenhin mab breyr
ar vaeth ganhat y brenhin. kyfranna+
ỽc vyd mab hỽnnỽ ar tref tayaỽc mal
vn oe veibon e hun.
PAn ranho brodyr tref eu tat y·ry+
dunt. y ieuhaf a geiff tydyn a| holl
adeil y tat. ac ỽyth erỽ. ae gallaỽr ae
| « p 34r | p 35r » |