NLW MS. Peniarth 46 – page 346
Brut y Brenhinoedd
346
oed y|llall. Y einaỽn y|bu uap. beli. Y|ueli
y|bu Jago. Y|Jago y|bu catuan uyn|tat
ynheu. a|run ỽedy marỽ einaỽn a|e dehol
les ynteu o|r saesson. a deuth hyt y|ỽlat
honn. ac a|rodes y uerch y|hyỽel uychan
ap. hyỽel. map emyr llydaỽ. ac y|r uerch hon+
no y|bu alan ap. hyỽel. uychan. ac y alan y
bu uab hyỽel dy|tat titheu y|gỽr a|uu
ryssỽr ar ffreinc ytra uu uyỽ a|hynny
yn ỽraỽl. AC yno y|trigyaỽd catỽallawn
y|gayaf hỽnnỽ. ac yd anuonassei breint
hir parth ac ynys. prydein. y|syllu a|damỽeinei
duỽ idaỽ cael deỽin edỽin y|ỽ lad mal y
bei haỽs idaỽ ef caffel dyuot y. ynys. prydein. ac
gỽedy breint hir hyt yn norhamtỽn.
kymryt a|oruc ỽisc ychennaỽc ymdan+
aỽ. a|pheri gỽneuthur bagyl idaỽ o o
hayarnn llym megys y|gallei llad y|de+
ỽin o|chyuaffei ac ef. a dyuot y caer e+
uraỽc lle yd oed etỽin yr amser hỽnnỽ.
a|phann yttoed ymplith yr ychenogyon
nachaf chỽaer idaỽ yn kyrchu dỽfyr
y|r urenhines. canys honno a|dugassei
| « p 345 | p 347 » |