NLW MS. Peniarth 46 – page 60
Brut y Brenhinoedd
60
a|ỽnaỽeth* hyt yn ffreinc. a|dyuot a
phorth gantaỽ y|gann suardus vrenhin
freinc. ac ymlad a|phorex y uraỽt.
a gỽedy ymlad o·nadunt y llas fer+
uex. a niuer a|doeth gantaỽ. a gỽedy
gỽybot oc eu mam hynny yr lad y|mab.
Sef a|ỽnaeth hi a|e llaỽuorynyon llad
y|mab byỽ yn lle y|marỽ trỽy y|gỽsc.
ac yna y rannỽyt yr ynys yn pumb
rann trỽy duundeb y chyỽdaỽt·ỽyr.
A C ym·penn yspeit y|kyuodes ~ ~ ~
gỽas Jeuanc clotuaỽr. Sef oed
y enỽ dyfynỽal moel mut mab
y clytno tyỽysaỽc kernyỽ. a gỽedy ma+
rỽ clydno. a chaffel o|dyfynỽal y|gyuo+
eth ryuelu a|ỽnaeth ar pimer urenhin
lloygyr. ac eissoes gỽedy llad pimer
y|duunassant yn|y erbyn. nydyaỽc
urenhin kernyỽ. ac ystater urenhin
y|gogled. a dechreu anreithaỽ kyuoeth
dyfynwal. a|dyuot a|ỽnaeth dyfynỽ+
| « p 59 | p 61 » |