NLW MS. Peniarth 9 – page 44v
Ystoria Carolo Magno: Can Rolant
44v
ydynt hỽy yn vn vryt gyfun. Nyt oys
dim gỽahanredaỽl y rolond y hun val na bo
kyffredin udunt hỽy. holl sỽllt charlymayn
yssyd yn|y vedyant ynteu. Ac o hỽnnỽ y pryn
ynteu ereill yn gedymdeithyon. Ac y dỽc val
yn rỽymedic ỽrth y vynnu. A pha hyt byn+
hac y parhaei ymdidan rỽg gỽenwlyd a blac+
cand am rolond y bu eu hymdidan yny ym+
rỽymyssant drỽy eu haruoll y wneuthur
brat rolond o ba dỽyll neu o ba ethrylith byn+
hac y gellynt y defnydyaỽ. A gỽedy ymwy+
neuthur velly yn gerenydus hỽynt a doyth+
ant y gyt y saragys hyt rac bron marsli.
Ac yna yd oyd varsli vrenhin yn eisted y my+
ỽn kadeir eur. ac yn|y gylch can mil o saracin+
eit yn gystal eu gostec ac na chlywit geir
ar ben vn onadunt yn aros ac yn damun+
aỽ eu kennadeu ac atteb udunt y gan char+
lymayn. Ac rac bron marsli y doyth blac+
cand a gỽenwlyd gantaỽ herwyd y llaỽ de+
heu a chyuarch gỽell idaỽ yn anrydedus y+
n|y mod hỽn. Mahumed ac a·polo ar dỽyeu
ereill a wyssenethy di udunt a|th anrydedho
di varsli ac a|th gatwo drỽy ganhorthỽy y
rei a cỽplayssam ni awch kenadỽri ychwi
ỽrth vrenhin ffreinc. Ac nyt attebaỽd mar+
sli ef ar hyny namyn dyrchauel y ỽyneb a|y
dỽylaỽ y vynyd a diolỽch y duỽ ef hynny.
ac yn nessaf y hynny y dywaỽt blaccand
| « p 44r | p 45r » |