NLW MS. Peniarth 9 – page 61v
Ystoria Carolo Magno: Chronicl Turpin
61v
helym milỽrayth. kyffelyb o glot y Judas macha+
beus. vn gedernyt a samsỽn. vn ryỽ y angeu ac
vn saỽl vrenhin a Jonathas. y marchaỽc gỽych+
af a grymussaf yn ryuel y doythaf ymlith llu+
oyd. distryỽ sarascinneit maỽr yr yscoloyd. am+
diffynnỽr cristynogyon. kynheilyat ymdiueit
a gỽraged gỽedwon. ymborth ychenogyon. ky+
nydỽr eglỽysseu. kyffredin ymrodyeu. kedym+
deith y baỽb. tywyssaỽc lluoyd ffydlaỽn. Ac ar
vn geir blodeu a hyder a|chỽyn holl gret yn er+
byn eu gelynyon. A pham y dugum dydi yr
gỽladoyd hyn pa delỽ y gallaf i edrych arnat ti
yn varỽ paham na bydaf varỽ nineu y gyt
a|thidi. Gỽay vi rac trueni pa wnaf|i bellach o
buchedoccaa di bellach gyt ac egylyon ar mer+
thyri ar seint a minheu am·danat ti bieu y kỽy+
naỽ ar hirayth. ar galar ar trueni. val y bu cỽyn+
van y dauyd am saỽl a Jonathas ac absalon.
A thydy yssyd yn mynet. a minheu yssyd yn
trigyaỽ yn trist o·valus. ac o|r kyfryỽ gỽyn
hỽnnỽ kỽynaỽ rolond tra vu dyd. A deu naỽ
mlỽyd ar|ugeint oyd y dyd y llas. Ac yn|y lle
yd oyd rolond yn varỽ y tynnassant eu pebyll+
eu y nos honno. ac iraỽ corff rolond a wnayth+
pỽyt ac ireideu gỽyrthuaỽr. myrr ac oleỽ. a
balsami. A gỽneuthur arỽylant maỽr idaỽ o
ganueu a|chỽynuaneu a gỽedieu. a|thapreu
kỽyr a|chaneu a goleuni ar hyt y coydyd ar
llỽyneu yr enryded y rolond yn hyt y nos
hono.
| « p 61r | p 62r » |