BL Cotton Titus MS. D IX – page 50v
Llyfr Blegywryd
50v
ỽyll y|verch. Seith yỽ y|hegỽedi. Gỽerth ga+
lanas maer yỽ; naỽ mu a|naỽ|vgein mv
gan tri drychauel. ac velly dros y kyghell+
aỽr. Dros sarhaet pob vn ohonunt y|te+
lir naỽ mv a|naỽ vgeint aryant. Punt
yỽ ebediỽ pob vn ohonunt. Ebediỽ breyr
yỽ; wheugeint. Ebediỽ bilaein brenhin dec a phetỽarugeint Ebediỽ bilaein breyr; tri
vgeint yỽ. kanny byd na maer. na|chyg+
hellaỽr a|dylyỽynt trayan ar|vilaeineit
breyr. O|R|byd eglỽys ar|tir bilaein bren+
hin; Whheugeint a|tal yn|y ebediỽ. Ebed+
iỽ abbat; deudec punt. Pedeir ar|hugeint
yỽ; ebediỽ gỽr ystauellaỽc. Deudec kein+
naỽc yỽ ebediỽ gỽreic ystauellaỽc. ac y
arglỽyd y|tir y bo yr ystauell arnaỽ y|te+
lir. Ebediỽ bonhedic cannhỽynnaỽl yỽ;
dec a|phetỽarvgeint. Ebediỽ alltut y ̷
rotho y|brenhin tir idaỽ; trivgeint yỽ.
a|hanner hynny a|tric y|r brenhin. Ka ̷+
nys megys tat idaỽ yỽ. a|r|hanner ar+
all a geiff y|maer. a|r kyghellaỽr yn deu
hanner yrydunt. Onny byd plant y|r
alltut; y holl da a geiff y brenhin. eithyr
kymeint a|e dylyet pan vo marỽ. Naỽdỽr
brenhin; wheugeint vyd y ebediỽ. a|hỽn+
nỽ a elỽir gỽaessauur. Y neb a|uo marỽ
| « p 50r | p 51r » |